لاہور: ایم 2 موٹروے ٹول ٹیکس میں 7 فیصد اضافے کا فیصلہ کر لیا گیا ہے۔ قومی ہائی وے اتھارٹی (این ایچ اے) نے لاہور سے اسلام آباد موٹروے پر نئی ٹول شرحوں کا باقاعدہ نوٹیفکیشن جاری کر دیا ہے، جو 5 جولائی 2026 سے نافذ العمل ہوں گی۔
نوٹیفکیشن کے مطابق نئی شرحوں کے تحت کار، جیپ اور ٹیکسی سے فی کلومیٹر 3 روپے 98 پیسے ٹول ٹیکس وصول کیا جائے گا۔ اسی طرح ویگن کے لیے فی کلومیٹر 6 روپے 68 پیسے جبکہ کوسٹر کے لیے 9 روپے 34 پیسے مقرر کیے گئے ہیں۔
این ایچ اے کے مطابق بسوں سے فی کلومیٹر 13 روپے 32 پیسے، ٹرکوں سے 17 روپے 33 پیسے جبکہ بڑے ٹرکوں سے 22 روپے سے زائد فی کلومیٹر ٹول ٹیکس وصول کیا جائے گا۔
حکام کا کہنا ہے کہ ایم 2 موٹروے ٹول ٹیکس میں یہ اضافہ این ایچ اے اور نجی کمپنی کے درمیان موٹروے کی دیکھ بھال، مرمت اور تعمیر سے متعلق 20 سالہ معاہدے کے تحت کیا گیا ہے۔
این ایچ اے کے مطابق معاہدے کی شرائط کے مطابق یہ تیرہویں سال کا سالانہ اضافہ ہے، جس کے تحت ٹول ٹیکس میں 7 فیصد اضافہ نافذ کیا جا رہا ہے۔ حکام کا کہنا ہے کہ حاصل ہونے والی آمدن موٹروے کی بہتر دیکھ بھال، مرمتی کاموں اور سفری سہولیات کو مزید مؤثر بنانے کے لیے استعمال کی جائے گی۔
لاہور اور اسلام آباد کے درمیان سفر کرنے والے شہریوں اور ٹرانسپورٹرز کو ہدایت کی گئی ہے کہ وہ 5 جولائی سے نافذ ہونے والی نئی ٹول شرحوں کو مدنظر رکھتے ہوئے اپنے سفری اخراجات کی منصوبہ بندی کریں۔
