اسلام آباد: انمول پنکی سے متعلق معاملہ ایک بار پھر قومی اسمبلی کی قائمہ کمیٹی برائے داخلہ کے اجلاس میں زیر بحث آیا، جہاں رکن قومی اسمبلی نبیل گبول نے اہم دعوے کرتے ہوئے کہا کہ انمول پنکی صرف ایک مہرہ ہے جبکہ اصل کردار کو بچانے کی کوشش کی جا رہی ہے۔
اجلاس کے دوران ڈائریکٹر جنرل اینٹی نارکوٹکس فورس (اے این ایف) نے کمیٹی کو بریفنگ دیتے ہوئے بتایا کہ انمول پنکی کے خلاف سال 2019 میں مقدمہ درج کیا گیا تھا۔ مقدمے کے اندراج کے بعد اسے اشتہاری بھی قرار دیا گیا تھا اور مختلف مراحل پر اس کے خلاف کارروائیاں جاری رہیں۔
اس موقع پر نبیل گبول نے اظہار خیال کرتے ہوئے کہا کہ انمول پنکی گزشتہ تقریباً 18 برس سے منشیات کے کاروبار سے منسلک رہی ہے۔ انہوں نے دعویٰ کیا کہ ایک منشیات کے عادی شخص کی موت کے بعد اس کی جیب سے ایک سکہ ملا جس پر انمول پنکی کا نام درج تھا، جس سے اس معاملے کے مزید پہلو سامنے آتے ہیں۔
نبیل گبول کا کہنا تھا کہ تحقیقات کا رخ صرف ایک شخصیت تک محدود نہیں رہنا چاہیے بلکہ اس پورے نیٹ ورک کو بے نقاب کرنا ضروری ہے۔ انہوں نے الزام لگایا کہ کچھ افراد کو بچانے اور کچھ کو قربانی کا بکرا بنانے کی کوشش کی جا رہی ہے۔
قائمہ کمیٹی کے اجلاس میں اس معاملے پر مزید تحقیقات اور حقائق سامنے لانے کی ضرورت پر بھی زور دیا گیا۔ کمیٹی اراکین کا کہنا تھا کہ منشیات کے کاروبار میں ملوث تمام عناصر کے خلاف بلاامتیاز کارروائی ہونی چاہیے تاکہ اس ناسور کا مکمل خاتمہ ممکن بنایا جا سکے۔
