بہاولپور(اے بی این نیوز)ضلع بہاولپور سے تعلق رکھنے والے ان افراد کو مبینہ طور پر 12 اپریل کو ایران کے ضلع مہرستان میں گولی مار کر قتل کر دیا تھا۔ایران کے صوبہ سیستان بلوچستان میں قتل کیے گئے 8 پاکستانیوں کی میتیں ابھی تک پاکستان نہیں پہنچ سکیں، تاہم حکام کو توقع ہے کہ لاشیں آج (بدھ کو) پاکستان پہنچ جائیں گی۔
جنوبی پنجاب کے ضلع بہاولپور سے تعلق رکھنے والے ان افراد کو مبینہ طور پر 12 اپریل کو ایران کے ضلع مہرستان میں ایک ورکشاپ میں نامعلوم مسلح افراد نے ہاتھ پاؤں باندھ کر گولی مار کر قتل کر دیا تھا، وہ تقریباً 5 سال سے اس علاقے میں موٹر مکینک کے طور پر کام کر رہے تھے۔
میڈیکو لیگل طریقہ کار اور ضروری دستاویزات مکمل کرنے کے بعد مرنے والوں کی میتیں زاہدان میں پاکستان کے قونصل جنرل کے حوالے کردی گئیں۔
تاہم منگل کی رات تک لاشیں پاکستانی حکام کے حوالے کرنے کے لیے تفتان بارڈر کراسنگ پر نہیں پہنچی تھیں۔تفتان میں حکام کا کہنا ہے کہ انہوں نے لاشوں کو وصول کرنے اور انہیں متاثرین کے آبائی علاقوں تک پہنچانے کے لیے تمام تیاریاں مکمل کر لی ہیں، زاہدان میں پاکستانی قونصل خانے نے انہیں مطلع کیا ہے کہ لاشیں بدھ (آج) کو آنے کی توقع ہے۔
مزید پڑھیں: عوام کے لئے اچھی خبر،بجلی مزید سستی ہونے کا امکان
