راولپنڈی( نیوز ڈیسک )صدر مملکت ڈاکٹر عارف علوی نے کہا ہے کہ تعلیم کے ذریعے ہی پاکستان قومی ترقی کو یقینی بنا سکتا ہے اور غربت، بے روزگاری، عدم برداشت اور انتہا پسندی کا خاتمہ کر سکتا ہے۔جمعرات کو ایوان صدر کے پریس ونگ سے جاری بیان کے مطابق 24ویں ایف سی ایس کانووکیشن کی تقریب نیشنل ڈیفنس یونیورسٹی (این ڈی یو) اسلام آباد میں منعقد ہوئی۔ اس موقع پر صدر مملکت ڈاکٹر عارف علوی مہمان خصوصی تھے۔ تقریب میں 4 پی ایچ ڈی، 48 ایم فل اور 208 بی ایس گریجویٹس کو ڈگریاں دی گئیں۔ پہلی اور دوسری پوزیشن حاصل کرنے والوں کو میڈلز اور امتیازی اسناد بھی دی گئیں۔اس موقع پر خطاب کرتے ہوئے صدر مملکت ڈاکٹر عارف علوی نے فارغ التحصیل ہونے والے طلباء کو ان کے تعلیمی کیریئر میں ایک اہم سنگ میل کی تکمیل پر مبارکباد دی۔ انہوں نے کہا کہ تعلیم کے ذریعے ہی پاکستان قومی ترقی کو یقینی بنا سکتا ہے اور غربت، بے روزگاری، عدم برداشت اور انتہا پسندی کا خاتمہ کر سکتا ہے۔آخر میں انہوں نے تمام فارغ التحصیل طلباء، ان کے والدین اور اہلخانہ کو اپنی تعلیم کی کامیابی سے تکمیل پر دلی مبارکباد دی۔صدر این ڈی یو لیفٹیننٹ جنرل نعمان محمود نے تقریب سے خطاب کرتے ہوئے اس بات پر زور دیا کہ کسی بھی قوم کا کردار اس کے تعلیمی اداروں میں تشکیل پاتا ہے۔ انہوں نے کہا کہ تعلیمی اور تحقیق میں اعلیٰ معیار حاصل کرنے کیلئے این ڈی یو اپنے طلباء کو علم حاصل کرنے کیلئے سازگار ماحول اور متعلقہ سہولیات فراہم کر رہی ہے۔ انہوں نے کہا کہ این ڈی یو گریجوایٹس کو پیشہ وارانہ کیریئر میں کردار اور عزم کا مظاہرہ کرنے کے لئے تیار کرنے کے لئے بھرپور کوششیں کر رہی ہے جس کے شاندار نتائج آئے ہیں۔ قبل ازیں صدر این ڈی یو لیفٹیننٹ جنرل نعمان محمود نے تقریب میں مہمان خصوصی، معززین، اساتذہ، والدین اور طلباء کا استقبال کیا۔
![](https://abnnews.pk/wp-content/uploads/2024/09/board-371x195.jpg)