لاہور(نیوزڈیسک)تحریک انصاف (پی ٹی آئی) کے چیئرمین عمران خان نے کہا ہے کہ ملک کو بچانے کا واحد حل الیکشن ہیں، حکمراں اتحاد پی ڈی ایم والے نہیں چاہتے کہ اقتدار میں دوبارہ آؤں۔چیئرمی پی ٹی آئی عمران خان نے کارکنوں سے بذریعہ ویڈیو لنک خطاب میں کہا کہ کارکنوں کے گھروں پر چھاپے مارے جارہے ہیں، جمہوریت میں اپنی عوام پر گولی نہیں چلائی جاتی، انہوں نے کہاکہ آئین ہمیں پر امن احتجاج کا حق دیتا ہے، مظاہرہ کرنا ہمارا حق ہے، جلاؤ گھیراؤ میں کوئی کارکن ملوث ہے تو ہمیں بتائیں، ہم ان کارکنوں کو پولیس کے حوالے کریں گے۔9 مئی کے جلاؤ گھیراؤ کے واقعات کی مذمت کرنے کے حوالے سے چیئرمین تحریک انصاف نے کہا کہ سپریم کورٹ میں چیف جسٹس عمر عطا بندیال نے جب پوچھا تو میں نے کہا کہ سخت مذمت کرتا ہوں،حکومت پر الزام عائد کرتے ہوئے انھوں نے کہا کہ پی ٹی آئی کو ختم کرنے کی سازش ہورہی ہے، پی ڈی ایم کو پتہ ہے کہ الیکشن میں ہمیں نہیں ہراسکتے، اس لئے انہوں نے ہمیں کالعدم کرنے کی کوشش شروع کردی ،انہوں نے کہا کہ لوگ پاکستان کو چھوڑ کر جارہے ہیں، لوگوں کی امیدیں ختم ہوگئیں ہیں، پی ڈی ایم کے رہنماؤں کے پیسے باہر پڑے ہیں، ملک تباہی کی طرف جارہا ہے، ان کاکہنا تھا کہ ملک کو بچانے کا واحد حل الیکشن ہیں، ملک میں انصاف نہیں ہے، ایک سال سے ملک میں افراتفری ہے، یہ نہیں چاہتے کہ میں اقتدار میں دربارہ آوں۔عمران خان نے کہا کہ 9 مئی کے واقعات کی تحقیقات اس لئے ضروری ہے کہ ہمارے اوپر الزامات لگائے جارہے ہیں۔ ”امجد علی خان نے کہا کہ کچھ لوگوں کے پاس کوئی چیز تھی جس سے ایلومینیم میں آگ لگائی گئی“، میں پوچھتا ہوں شوکت یوسفزئی جب لوگوں کو روک رہے تھے تو وہ کون تھے جنہوں نے ان کے کپڑے پھاڑے، انہوں نے کہاکہ ہم چاہتے ہیں ان واقعات کی شفاف تحقیق ہونی چاہئے۔اسلام آباد ہائیکورٹ سے اپنی گرفتاری کی بات کرتے ہوئے عمران خان نے کہا کہ رینجرز نے لوگوں اور وکیلوں کو مارا، بائیو میٹرک کے لیے بیٹھے عملے کو بھی نشانہ بنایا، مشینیں توڑ دیں۔