اسلام آباد(نیوزڈیسک)چیئرمین پیپلز پارٹی بلاول بھٹو زرداری نے کہا ہےکہ پارلیمنٹ ہی سپریم ہے سب کو اس کے سامنے سر تسلیم خم کرنا پڑےگا۔چیئرمین پیپلز پارٹی بلاول بھٹو زرداری نے کہا کہ 14 مئی پاکستان اور جمہوریت کے لیے تاریخ ساز دن ہے، آج کے دن بینظیر بھٹو شہید اور نواز شریف نے میثاق جمہوریت کی دستاویز پر دستخط کیے، میثاق جمہوریت پر ثابت قدمی سے عمل کرنے سے ملک کے وقار میں اضافہ اور جمہوریت مضبوط ہوئی۔انہوں نے کہاکہ آصف علی زرداری نے میثاق جمہوریت پر عمل کرتے ہوئے اختیارات پارلیمان کے حوالے کیے، 18ویں آئینی ترمیم وفاق اور تمام اکائیوں کے درمیان ایک میثاق ہے، آج پارلیمان پر حملے ہو رہے ہیں اور اس کے اختیارات کو چیلنج کیا جا رہا ہے، نیا آئین لکھا جا رہا ہے جو پاکستان پیپلزپارٹی کو کسی صورت منظور نہیں، آئین سازی کا اختیار صرف پارلیمنٹ کو حاصل ہے۔بلاول نے کہاکہ ریاست کے باقی اداروں کا فرض ہےکہ وہ پارلیمان کے منظور کردہ قانون پر عمل کریں، اراکین پارلیمنٹ اور جمہوریت پسند سیاسی پارٹیاں با اختیار پارلیمنٹ کے اصول پر ایک صفحہ پر ہیں، انہوں نے کہاکہ میثاق جمہوریت پر سختی اور ثابت قدمی پر عمل سے غیر جمہوری سوچ کو شکست دینی ہوگی۔