لاہور(اے بی این نیوز)وزیراعلیٰ گلگت بلتستان خالد خورشیدنےکابینہ و اراکین اسمبلی کے ہمراہ زمان پارک میں چیئرمین تحریک انصاف عمران خان سے خصوصی ملاقات کی ہے۔ گلگت بلتستان میں تحریک انصاف کی حکومت کے فلاحی اقدامات، تنظیمی معاملات اور ملکی مجموعی سیاسی صورتحال پر تفصیلی تبادلۂ خیال کیا گیا۔ گلگت بلتستان کے منتخب نمائندوں کیجانب سے چیف جسٹس آف پاکستان اور عدلیہ سے بھرپور یکجہتی کا اظہار کیا گیا۔ وزیراعلیٰ گلگت بلتستان خالد خورشیدنے کہا کہ ملک بھر کیطرح گلگت بلتستان کے عوام چیئرمین عمران خان کی قیادت میں قانون کی حکمرانی کے ساتھ کھڑے ہیں، عمران خان کی قیادت میں اپنی کابینہ، مشیران، معاونین اور منتخب نمائندوں سمیت شرکت کو باعثِ فخر سمجھتا ہوں۔آئین کی بالادستی اور چیف جسٹس سے اظہارِ یکجہتی کیلئے نکالی گئی ریلی میں ہماری شرکت گلگت بلتستان کے عوام کی امنگوں کی ترجمانی ہے۔گلگت بلتستان کی حکومت، منتخب نمائندے نچلی ترین سطح تک عوام پوری یکسوئی سے چیئرمین عمران خان کے حقیقی آزادی کے ویژن کی تائید کرتے ہیں،آئین کی بالادستی اور قانون کی حکمرانی کیلئے بڑی سے بڑی قربانی سے دریغ نہیں کریں گے نہ چیئرمین عمران خان کی بھرپور حمایت سے ایک انچ پیچھے ہٹیں گے،وفاق کی مضبوطی و ترقی آئین کے حد درجہ احترام سے وابستہ ہے۔وزیراعلیٰ گلگت بلتستان نے مزید کہا کہ عوامی مینڈیٹ کی راہ میں روڑے اٹکانے یا اس سے چھیڑ چھاڑ کرنے والی قومی وحدت کو نقصان پہنچاتے ہیں۔آئین پر حملے کرکے وفاق میں ہیجان برپا کرنے کی بجائے عوام کے حقِ حاکمیت، عوامی مینڈیٹ کے احترام کی روش اپنائی جائے۔گلگت بلتستان کے عوام اور انکے منتخب عمائدین آئینی حقوق کے تحفظ اور مکمل سیاسی آزادیوں پر یقین رکھتے ہیں۔آئین کی بالادستی، قانون کی حکمرانی اور جمہوریت کے بقاء کی تحریک میں چیئرمین عمران خان کے شانہ بشانہ ہیں۔
