اسلام آباد(اے بی این نیوز)وفاقی وزیر برائے ماحولیاتی تبدیلی سینیٹر شیری رحمٰن نے کہا ہے کہ ملک کے بیشتر حصوں میں آندھی، ژالہ باری اور گرج چمک کے ساتھ بارشوں کے امکان کے پیشِ نظر تمام متعلقہ اداروں کو اس دوران الرٹ رہنے اور صوبوں کو احتیاطی تدابیر اختیار کرنے کا مشورہ دیا گیا ہے۔ بدھ کو اپنے ایک بیان میں انہوں نے کہا کہ محکمہ موسمیات نے 26 اپریل سے ملک کے بیشتر حصوں میں آندھی، ژالہ باری اور گرج چمک کے ساتھ بارش کی پیشگوئی ہے، تمام متعلقہ اداروں کو اس دوران الرٹ رہنے کی ہدایت کی گئی ہے۔ انہوں نے کہا کہ صوبوں کو مشورہ دیا جاتا ہے کہ وہ احتیاطی تدابیر اختیار کریں، ان تدابیر میں نالوں کی صفائی، بجلی کے کھمبوں کی مضبوطی اور مقامی سیلاب کی صورت میں سڑکوں تک رسائی شامل ہے، خاص طور پر جہاں 2022 کے سیلاب کے بعد مرمت کا کام ابھی بھی جاری ہے۔ شیری رحمان نے کہا کہ بارشوں کے دوران خیبر پختون خواہ ، گلگت بلتستان، کشمیر، مری اور گلیات کے پہاڑی علاقوں میں طغیانی اور لینڈ سلائیڈنگ کا خطرہ ہے، موسلا دھار بارشوں سے مانسہرہ، ایبٹ آباد، چترال، دیر، سوات، کوہستان، گلگت بلتستان اور کشمیر میں یکم سے 4 مئی اور بلوچستان کے کچھ حصوں اور ڈی جی خان کے پہاڑی علاقوں میں 28 اپریل سے 2 مئی تک سیلاب آسکتا ہے جبکہ کشمیر سے کراچی تک غیر مستحکم موسمی نظام اور شہری سیلاب کا بھی خدشہ ہے، اس عرصے کے دوراں سیاحوں کو محتاط رہنے کی ہدایت کی گئی ہے۔ انہوں نے کہا کہ بلوچستان اور سندھ کے ساحلی علاقوں کے لئے خصوصی ایڈوائزری بھی جاری کر دی گئی ہے، ماہی گیروں کو سمندروں میں چوکنا رہنے کی ضرورت ہے، کسان حضرات بارشوں کو مدنظر رکھتے ہوئے اپنی معاملات ترتیب دیں۔