ملک میں سونے اور چاندی کی قیمتوں میں نمایاں کمی ریکارڈ کی گئی ہے، جس کے بعد فی تولہ سونا ہزاروں روپے سستا ہوگیا۔ تازہ اعداد و شمار کے مطابق سونے کی قیمت میں 10 ہزار 800 روپے کی کمی ہوئی ہے، جبکہ چاندی کے نرخ بھی نیچے آگئے ہیں۔
تفصیلات کے مطابق فی تولہ سونا 10 ہزار 800 روپے سستا ہونے کے بعد 4 لاکھ 9 ہزار 736 روپے کا ہوگیا ہے۔ اسی طرح 10 گرام سونے کی قیمت میں 9 ہزار 259 روپے کمی ریکارڈ کی گئی، جس کے بعد نئی قیمت 3 لاکھ 51 ہزار 282 روپے مقرر ہوئی۔
بین الاقوامی مارکیٹ میں بھی سونے کی قیمت میں نمایاں کمی دیکھی گئی ہے۔ دستیاب اعداد و شمار کے مطابق عالمی سطح پر سونا 108 ڈالر سستا ہوکر 3 ہزار 872 ڈالر فی اونس پر آگیا ہے۔
عالمی مارکیٹ میں قیمتوں کی اس تبدیلی کے اثرات مقامی صرافہ بازار میں بھی دیکھنے میں آئے ہیں۔ سونے کے نرخ میں کمی کے باعث زیورات خریدنے کے خواہش مند افراد کی توجہ بھی تازہ قیمتوں کی جانب ہوگئی ہے۔
چاندی کی قیمت میں بھی کمی ریکارڈ
سونے کے ساتھ چاندی کی قیمتوں میں بھی کمی سامنے آئی ہے۔ مقامی مارکیٹ میں فی تولہ چاندی 142 روپے سستی ہوکر 5 ہزار 388 روپے کی ہوگئی ہے، جبکہ 10 گرام چاندی کی قیمت 122 روپے کم ہونے کے بعد 4 ہزار 619 روپے ریکارڈ کی گئی۔
دوسری جانب عالمی مارکیٹ میں چاندی کی قیمت 1.42 ڈالر کمی کے بعد 49.10 ڈالر فی اونس پر ٹریڈ کر رہی ہے۔
