اسلام آباد ( اے بی این نیوز ) اسلام آباد میں ایران اور امریکہ کے درمیان براہِ راست مذاکرات کے حوالے سے اہم پیش رفت سامنے آئی ہے، جہاں ذرائع کے مطابق امریکی وفد کی آمد سے قبل سیکیورٹی اور لاجسٹک انتظامات کو غیر معمولی سطح پر سخت کر دیا گیا ہے۔
ذرائع کا کہنا ہے کہ امریکی وفد کے لیے خصوصی بلٹ پروف اور بم پروف گاڑیاں اسلام آباد پہنچا دی گئی ہیں، جنہیں انتہائی حساس نوعیت کے پیش نظر خصوصی طیارے کے ذریعے پاکستان منتقل کیا گیا۔ ان گاڑیوں کو وی آئی پی اور ہائی سیکیورٹی پروٹوکول کے تحت استعمال میں لایا جائے گا تاکہ وفد کی نقل و حرکت مکمل تحفظ کے ساتھ یقینی بنائی جا سکے۔
مزید بتایا جا رہا ہے کہ امریکی وفد کے معاون عملے کے مزید ارکان بھی اسلام آباد پہنچ چکے ہیں، جہاں ان کی رہائش اور دیگر انتظامات مکمل کیے جا رہے ہیں۔ سیکیورٹی ادارے اور متعلقہ حکام اس پورے دورے کے دوران فول پروف انتظامات کو یقینی بنانے کے لیے متحرک ہیں۔
ان مذاکرات کو خطے کی صورتحال کے تناظر میں خاصی اہمیت دی جا رہی ہے، کیونکہ عالمی سطح پر ایران اور امریکہ کے درمیان کشیدگی اور مختلف امور پر اختلافات طویل عرصے سے جاری ہیں۔ ایسے میں براہِ راست مذاکرات کو سفارتی سطح پر ایک مثبت پیش رفت کے طور پر دیکھا جا رہا ہے، جس کا مقصد باہمی رابطے کو فروغ دینا اور ممکنہ طور پر تناؤ میں کمی لانا ہے۔
اسلام آباد میں اس پیش رفت کے بعد سیکیورٹی ہائی الرٹ کر دی گئی ہے جبکہ متعلقہ ادارے حساس مقامات پر نگرانی مزید سخت کر رہے ہیں تاکہ وفود کی آمد و رفت اور مذاکرات کا عمل پرامن ماحول میں مکمل ہو سکے۔
مزید پڑھیں :ہفتے کو مذاکرات میں فریقین دفتر خارجہ میں براہ راست ملاقات کریں گے
