اسلام آباد (اے بی این نیوز)وزیر اعظم شہباز شریف اور فیلڈ مارشل عاصم منیر کی ساکھ میں اضافہ دیکھ کر بھارتی تجزیہ کاروں نے وزیر اعظم نریندر مودی کو تنقید کا نشانہ بنایا ہے۔
ایک تجزیہ کار نے کہا کہ 10 سال پہلے نریندر مودی نے کہا تھا کہ اڑی واقعے کے بعد پاکستان عالمی سطح پر تنہا ہو جائے گا۔ آج سفارت کاری کے میدان میں پاکستان کا نام ہے اور بھارت اور نریندر مودی کا نام تک نہیں ہے۔
بھارتی اپوزیشن جماعت کانگریس نے بھی نریندر مودی کو نہیں بخشا، انہیں تنقید کا نشانہ بنایا اور دعویٰ کیا کہ امریکا اور ایران کے درمیان دو ہفتے کی جنگ بندی میں پاکستان کے کردار نے ان کی انتہائی ذاتی سفارتکاری کو شدید دھچکا پہنچایا ہے اور خود ساختہ عالمی ٹائیکون پوری طرح بے نقاب ہو گیا ہے۔
کانگریس کے جنرل سکریٹری برائے اطلاعات جے رام رمیش نے کہا کہ جنگ بندی میں پاکستان کی شرکت دہشت گردی کے معاملے پر عالمی سطح پر اسلام آباد کو تنہا کرنے کی ہندوستان کی دیرینہ پالیسی کو نقصان پہنچاتی ہے۔
انہوں نے مزید کہا کہ پاکستان کا کردار مودی کی سفارت کاری کے انداز اور مادہ دونوں پر سوال اٹھاتا ہے۔
انہوں نے بھارت کے آپریشن سندھور پر بھی وضاحت طلب کی اور مودی پر الزام لگایا کہ انہوں نے مئی 2025 میں جنگ کے اچانک خاتمے کے لیے کبھی بھی مناسب وضاحت نہیں دی۔
جے رام رمیش نے یہ بھی کہا کہ مودی کا 56 انچ کا سینہ سکڑ گیا ہے۔
واضح رہے کہ پاکستان کی کامیاب سفارت کاری کے باعث امریکی صدر ڈونلڈ ٹرمپ نے جنگ بندی میں دو ہفتے کی توسیع کردی ہے جب کہ ایران کے نئے سپریم لیڈر مجتبیٰ خامنہ ای نے بھی جنگ بندی کی منظوری دے دی ہے۔
امریکی صدر ڈونلڈ ٹرمپ نے ایران کے آبنائے ہرمز کو دوبارہ کھولنے یا شہری انفراسٹرکچر پر حملہ کرنے کی ڈیڈ لائن سے صرف ڈیڑھ گھنٹہ قبل جنگ بندی کا اعلان کیا۔
