اسلام آباد (اے بی این نیوز )غیر سرکاری تنظیم رویتِ ہلال ریسرچ کونسل نے پاکستان میں شعبان کے چاند سے متعلق پیشگوئی جاری کر دی ہے۔کونسل کے سیکرٹری جنرل خالد اعجاز مفتی کے مطابق شعبان کا چاند اتوار 18 اور پیر 19 جنوری 2026 کی درمیانی شب پاکستانی وقت کے مطابق رات 12 بج کر 52 منٹ پر پیدا ہوگا۔
ان کا کہنا ہے کہ پیر 19 جنوری کو غروبِ آفتاب کے وقت چاند کی عمر 18 گھنٹے سے کم ہوگی، جبکہ ہلال کی رویت کے لیے چاند کی کم از کم عمر 19 گھنٹے ہونا ضروری تصور کی جاتی ہے۔ اسی وجہ سے 19 جنوری بروز پیر شعبان کا چاند نظر آنے کا امکان نہیں۔
رویتِ ہلال ریسرچ کونسل کے مطابق غروبِ شمس اور غروبِ قمر کے درمیان فرق بھی مطلوبہ معیار پر پورا نہیں اترتا۔ گلگت اور مظفر آباد میں یہ فرق 29 منٹ، پشاور، اسلام آباد، لاہور اور چارسدہ میں 30 منٹ، کوئٹہ میں 31 منٹ جبکہ کراچی اور جیوانی میں 33 منٹ ہوگا، جبکہ چاند دیکھنے کے لیے کم از کم 40 منٹ کا فرق ضروری سمجھا جاتا ہے۔
کونسل کا کہنا ہے کہ 20 جنوری کو چاند نظر آنے کا امکان موجود ہے، جس کے بعد شعبان 1447 ہجری کا آغاز 21 جنوری بروز بدھ سے ہو سکتا ہے۔واضح رہے کہ چاند کی رویت کا حتمی اعلان مرکزی رویتِ ہلال کمیٹی کی جانب سے کیا جائے گا۔
مزید پڑھیں :عمران خان کی ملاقاتوں پر پابندی غیرانسانی عمل ہے: محمود خان اچکزئی
