لاہور (اے بی این نیوز) اسکولوں کے اوقاتِ کار میں تبدیلی کردی گئی، نئے اوقات کا اطلاق 19 جنوری سے 15 اپریل 2026 تک ہوگا۔
تفصیلات کے مطابق محکمہ اسکول ایجوکیشن پنجاب نے سرکاری اسکولوں کے اوقاتِ کار میں تبدیلی کا باقاعدہ نوٹیفکیشن جاری کر دیا۔
جس کے تحت نئے اوقات کا اطلاق 19 جنوری سے 15 اپریل 2026 تک ہوگا۔
جاری نوٹیفکیشن میں کہا گیا کہ پنجاب بھر میں سنگل شفٹ سرکاری اسکول پیر سے جمعرات تک صبح 10 بجے سے دوپہر 2 بج کر 15 منٹ تک کھلے رہیں گے، جبکہ جمعہ کے روز تدریسی اوقات صبح 10 بجے سے دوپہر 12 بج کر 30 منٹ تک ہوں گے۔
ڈبل شفٹ اسکولوں میں صبح کی شفٹ صبح 10 بجے سے دوپہر 2 بجے تک جبکہ دوپہر کی شفٹ 2 بج کر 15 منٹ سے شام 4 بج کر 45 منٹ تک جاری رہے گی۔
نوٹیفکیشن میں اساتذہ کے لیے بھی نئی ہدایات جاری کی گئی ہیں۔ پیر سے جمعرات تک اساتذہ کے اوقاتِ کار میں تدریسی تیاری، پیشہ ورانہ تربیت اور ٹریننگ سیشنز کو شامل کر لیا گیا ہے۔
محکمہ تعلیم کے مطابق اساتذہ کی متبادل ہفتوں میں ہفتہ کے روز حاضری بھی لازمی قرار دی گئی ہے، جس کا مقصد تدریسی معیار اور پیشہ ورانہ صلاحیتوں میں بہتری لانا ہے۔
مزید پڑھیں: سیاسی درجہ حرارت نیچے لانے کے لیے کردار ادا کریں، فواد چوہدری کی نواز شریف سے اپیل
