اسلام آباد(اے بی این نیوز)عالمی سطح پر جغرافیائی اور معاشی غیر یقینی صورتحال کے باعث سونا اور چاندی کی قیمتیں نئی ریکارڈ سطحوں پر پہنچ گئی ہیں۔
پیر کے روز سونے کی قیمت تاریخ میں پہلی بار 4,600 ڈالر فی اونس کی حد عبور کر گئی، جبکہ چاندی نے بھی اپنی بلند ترین سطح کو چھو لیا۔
عالمی مارکیٹ میں اسپاٹ گولڈ کی قیمت میں 1.3 فیصد اضافہ ہوا اور یہ 4,469.49 ڈالر فی اونس تک پہنچ گئی، جبکہ دورانِ کاروبار سونا 4,600.33 ڈالر کی ریکارڈ سطح پر بھی گیا۔ فروری ڈیلیوری کے لیے امریکی گولڈ فیوچرز 2 فیصد اضافے کے ساتھ 4,591.10 ڈالر پر ٹریڈ کرتے رہے۔
سینئر مارکیٹ تجزیہ کاروں کے مطابق سونے اور چاندی کی قیمتوں میں تیزی کی بنیادی وجہ جغرافیائی خطرات اور عالمی سیاسی کشیدگی ہے، جس نے سرمایہ کاروں کو محفوظ سرمایہ کاری کی جانب راغب کیا ہے۔
امریکا میں کمزور روزگار کے اعداد و شمار کے بعد یہ توقعات بھی مضبوط ہوئی ہیں کہ فیڈرل ریزرو رواں برس کم از کم دو بار شرحِ سود میں کمی کر سکتا ہے، جس سے بغیر منافع دینے والی دھاتوں، خصوصاً سونے اور چاندی، کی طلب میں اضافہ ہوا۔
ڈالر کی قدر میں کمی نے بھی قیمتی دھاتوں کو سہارا دیا۔دوسری جانب چاندی کی قیمت میں 3.5 فیصد اضافہ ہوا اور یہ 82.72 ڈالر فی اونس تک پہنچ گئی، جبکہ دورانِ سیشن 83.96 ڈالر کی تاریخی بلند ترین سطح بھی ریکارڈ کی گئی۔ پلاٹینم کی قیمت میں بھی 3.2 فیصد اضافہ ہوا اور یہ 2,345.40 ڈالر فی اونس پر جا پہنچی، جبکہ گزشتہ ماہ 2,478.50 ڈالر کی بلند سطح دیکھی گئی تھی۔
مزید پڑھیں: ملک کے مختلف شہروں میں آٹے کی نئی قیمتیں سامنے آ گئیں
