لاہور (اے بی این نیوز )نیو ایئر نائٹ کے موقع پر امن و امان برقرار رکھنے کے لیے پنجاب پولیس کو صوبہ بھر میں ہائی الرٹ کر دیا گیا ہے اور سیکیورٹی کے سخت انتظامات مکمل کر لیے گئے ہیں۔آئی جی پنجاب ڈاکٹر عثمان انور نے لاہور سمیت تمام اضلاع میں فول پروف سیکیورٹی انتظامات کی ہدایات جاری کی ہیں۔ ترجمان پنجاب پولیس کے مطابق سالِ نو کی آمد پر صوبہ بھر میں 25 ہزار سے زائد پولیس افسران اور اہلکار سیکیورٹی ڈیوٹی انجام دیں گے۔
ترجمان کا کہنا ہے کہ سیکیورٹی ڈیوٹی پر 419 انسپکٹرز، 1267 سب انسپکٹرز، 2189 اسسٹنٹ سب انسپکٹرز، 1408 ہیڈ کانسٹیبلز اور 16 ہزار 977 کانسٹیبلز و دیگر اہلکار تعینات کیے گئے ہیں۔ صرف لاہور میں 5 ہزار سے زائد پولیس افسران اور اہلکار مختلف حساس مقامات پر تعینات ہوں گے۔
آئی جی پنجاب نے ہدایت دی ہے کہ صوبہ بھر میں سی سی ٹی وی کیمروں کے ذریعے تمام سرگرمیوں کی مسلسل مانیٹرنگ کی جائے گی اور ملک دشمن و شرپسند عناصر پر کڑی نظر رکھی جائے گی۔ نیو ایئر نائٹ پر ون ویلنگ، ہوائی فائرنگ، اسلحہ کی نمائش اور ہلڑبازی کی کسی صورت اجازت نہیں ہوگی۔
انہوں نے واضح کیا کہ خواتین اور شہریوں کو ہراساں کرنے والے عناصر کے خلاف فوری اور سخت کارروائی عمل میں لائی جائے گی۔ ٹریفک کے مربوط انتظامات کے لیے ڈولفن اسکواڈ، پیرو، ایلیٹ فورس اور پنجاب ہائی وے پٹرول کی ٹیمیں سڑکوں اور شاہراہوں پر گشت بڑھائیں گی۔
سی سی پی او لاہور، آر پی اوز اور ڈی پی اوز کو امن و امان کی صورتحال کی خود نگرانی کرنے کی ہدایت بھی جاری کی گئی ہے۔ آئی جی پنجاب نے شہریوں سے اپیل کی ہے کہ ون ویلنگ، ہوائی فائرنگ یا کسی بھی مشکوک سرگرمی کی فوری اطلاع ہیلپ لائن 15 پر دیں تاکہ بروقت کارروائی ممکن بنائی جا سکے۔
مزید پڑھیں :نئے سال کی آمد،خوشخبری،سونا،چاندی اپ ڈیٹ آگئی
