پشاور (اے بی این نیوز) پاکستان تحریک انصاف (پی ٹی آئی) نے یکم دسمبر کو صوابی موٹر وے بند کرنے کا اعلان کر دیا۔
پارٹی رہنما احمد خان نیازی کے مطابق یکم دسمبر کو پشاور موٹر وے سے ایک بڑی ریلی نکالی جائے گی، ریلی ان کی قیادت میں صوابی پہنچے گی جہاں مرکزی احتجاج کیا جائے گا۔ انہوں نے کہا کہ یہ احتجاج ایک روزہ ہوگا اور اس کا مقصد صرف موٹر وے بند کرنا نہیں بلکہ عدالتی حکم کے مطابق عمران خان کی رہائی اور ملاقات کو یقینی بنانا ہے۔
پی ٹی آئی رہنما کا کہنا تھا کہ ان کا مطالبہ صرف ملاقات تک محدود نہیں بلکہ عمران خان کی فوری رہائی کا بھی ہے کیونکہ پی ٹی آئی کے مطابق عمران خان کے خلاف درج مقدمات سیاسی نوعیت کے ہیں اور موجودہ حکومت مبینہ طور پر انہیں سیاسی میدان سے باہر رکھنے کی کوشش کر رہی ہے۔ احمد خان نیازی نے واضح کیا کہ یہ احتجاج عوامی حمایت سے کیا جائے گا اور کارکنوں کو ہدایت کی گئی ہے کہ احتجاج کے دوران قانون ہاتھ میں نہ لیں۔
انہوں نے مزید کہا کہ ملک بھر کے کارکنوں میں شدید غصہ ہے کیونکہ عمران خان کی صحت، حفاظت اور قانونی حقوق پر سوالات اٹھائے جا رہے ہیں۔ پی ٹی آئی کے مطابق شفاف معلومات فراہم کرنے اور ملاقاتوں کی اجازت دینے میں حکومت کی ناکامی سیاسی انتقام کی نشاندہی کرتی ہے۔
مزید پڑھیں:چھانگلہ گلی کے قریب مسافر وین میں آگ لگ گئی
