ایبٹ آباد (اے بی این نیوز) چھانگلہ گلی کے قریب مسافر وین میں اچانک آگ بھڑک اٹھی، گاڑی مکمل طور پر جل کر راکھ ہو گئی۔
خوش قسمتی سے تمام مسافر بروقت گاڑی سے نکلنے میں کامیاب ہو گئے اور کوئی جانی نقصان نہیں ہوا۔
حادثہ اس وقت پیش آیا جب وین چھانگلہ گلی سے گزر رہی تھی۔ اچانک وین میں دھواں اٹھنے لگا اور چند ہی لمحوں میں گاڑی کے اندر آگ پھیلنے لگی۔ ڈرائیور نے فوری طور پر گاڑی روک کر مسافروں کو محفوظ مقام پر پہنچا دیا جس سے بڑا نقصان ٹل گیا۔
ریسکیو حکام کے مطابق آگ لگنے کی اصل وجہ تاحال معلوم نہیں ہوسکی اور حادثے کی وجوہات جاننے اور مستقبل میں ایسے واقعات کی روک تھام کے لیے تحقیقات جاری ہیں۔
حادثے کے بعد مقامی لوگوں اور عینی شاہدین نے مسافروں کی بروقت رہنمائی اور ڈرائیور کے درست اقدام کو بھی سراہا جس کے نتیجے میں کوئی جانی نقصان نہیں ہوا۔ حکام نے شہریوں سے اپیل کی ہے کہ وہ اپنی گاڑیوں کی حفاظتی حالت کا باقاعدگی سے جائزہ لیں تاکہ مستقبل میں ایسے حادثات سے بچا جا سکے۔
مزید پڑھیں:جنوبی افریقا کے اسٹار پاکستان سپر لیگ میں شامل
