لاہور(اے بی این نیوز)پاکستان کرکٹ بورڈ (پی سی بی) نے ہیڈ کوچ ویمن کرکٹ ٹیم محمد وسیم کو نیا کنٹریکٹ نہ دینے کا اصولی فیصلہ کر لیا۔ذرائع کے مطابق محمد وسیم کو ہیڈ کوچ کے عہدے سے ہٹانے کا فیصلہ کر لیا گیا۔ ان کی جگہ اگلے ہفتے نئے ہیڈ کوچ کی تقرری کا امکان ہے۔
محمد وسیم کو 2024 میں قومی ویمن ٹیم کا ہیڈ کوچ بنایا گیا تھا۔ اب انہیں ہٹانے کی وجوہات سامنے آگئی ہیں۔ ذرائع کے مطابق محمد وسیم کی کوچنگ میں پاکستان ویمن ٹیم مسلسل زوال پذیر ہوئی، بورڈ کی مکمل سپورٹ ملنے کے باوجود محمد وسیم نتائج دینے میں ناکام رہے۔دعوؤں کے برعکس ٹیم ویمن ورلڈ کپ کا ایک بھی میچ نہ جیت سکی۔
ہیڈ کوچ ہونے کے باوجود کھلاڑیوں کو کوچنگ نہ کرنے کی شکایت بھی سامنے آئی ہے۔محمد وسیم خود بیٹسمین تھے لیکن ویمن ٹیم کی بیٹنگ کمزور ترین ہوگئی۔
ان کا رویہ اکھڑ مزاج رہا، ان کی بولنگ اور بیٹنگ کوچ سمیت کھلاڑیوں سے بھی نہ بن سکی۔وہ ہیڈ کوچ ہونے کے ساتھ ٹیم کی سلیکشن میں بھی شامل رہے اور سپورٹ اسٹاف کی تقرریاں بھی مرضی سے کیں لیکن پھر بھی نتائج صفر رہے۔ ذرائع کے مطابق ویمن ٹیم بولنگ کے شعبے میں بھی مسلسل تنزلی کا شکار رہی اور ٹیم کی فیلڈنگ بھی بہتر نہ ہو پائی۔
مزید پڑھیں: اڈیالہ جیل سے امراض قلب کے اسپتال منتقل 3 قیدیوںمیں سے ایک چل بسا
