افغانستان(اے بی این نیوز)افغانستان کے مشرقی صوبے میدان وردک کے مضافات میں ایک بس الٹنے کے نتیجے میں کم از کم 25 افراد جاں بحق اور 27 زخمی ہو گئے۔
عالمی خبر رساں ادارے اے ایف پی کے مطابق وزارت داخلہ کے ترجمان عبدالمتین قانی نے کہا کہ یہ حادثہ ’ ڈرائیور کی غفلت’ کی وجہ سے دارالحکومت کابل کے قریب جنوبی شہر قندھار کی طرف جانے والی شاہراہ پر پیش آیا۔
عبدالمتین قانی کے مطابق حادثے میں 25 افراد جاں بحق ہوئے جبکہ 27 زخمیوں کو ہسپتالوں میں منتقل کیا گیا ہے، البتہ زخموں کی شدت کے بارے میں کچھ نہیں بتایا گیا۔
افغانستان میں جان لیوا ٹریفک حادثات عام ہیں، جن کی ایک بڑی وجہ کئی دہائیوں تک جاری رہنے والی جنگ اور خانہ جنگی کے بعد خراب سڑکوں، شاہراہوں پر خطرناک ڈرائیونگ اور قوانین کی کمی ہے۔
گزشتہ منگل کو افغانستان کے مغربی صوبہ ہرات میں ایران سے واپس آنے والے مہاجرین کو لے جانے والی ایک بس کی موٹر سائیکل اور ٹرک سے ٹکر ہو گئی تھی، اس خوفناک ٹریفک حادثے میں 78 افراد جاں بحق ہوئے تھے، جن میں ایک درجن سے زائد بچے بھی شامل تھے۔
گزشتہ سال دسمبر میں، وسطی افغانستان کی ایک شاہراہ پر ایندھن بردار ٹینکر اور ایک ٹرک کے ساتھ دو بس حادثات میں کم از کم 52 افراد جاں بحق ہوئے تھے۔
مزید پڑھیں۔سندھ اسمبلی کے ممبران کی تنخواہ ڈیڑھ لاکھ سے بڑھا کر ساڑھے 4 لاکھ کردی گئی
