راولپنڈی (اے بی این نیوز)فیلڈ مارشل آرمی چیف جنرل عاصم منیر کا کہنا ہے کہ پاک فوج بلوچستان کے عوام کے شانہ بشانہ کھڑی ہے۔فوج کے شعبہ تعلقات عامہ ( آئی ایس پی آر ) کے مطابق فیلڈ مارشل آرمی چیف جنرل عاصم منیر نے بلوچستان کے علاقے تربت کا دورہ کیا جس کا مقصد خطے میں موجودہ سکیورٹی صورتحال کا جائزہ لینا، ترقیاتی منصوبوں کی پیشرفت کا معائنہ کرنا اور سول و عسکری اداروں کے درمیان رابطہ و ہم آہنگی کو مزید مستحکم بنانا تھا۔
اس موقع پر وزیر اعلیٰ بلوچستان، چیف سیکرٹری اور دیگر اعلیٰ حکام بھی موجود تھے۔فیلڈ مارشل آرمی چیف جنرل عاصم منیر کو سکیورٹی امور، خطے کو درپیش خطرات اور فتنہ الہند کے خلاف کامیاب آپریشنز کے حوالے سے تفصیلی بریفنگ دی گئی۔ انہیں جاری ترقیاتی منصوبوں اور جنوبی بلوچستان میں سماجی و معاشی حالات کو بہتر بنانے کی حکومتی و عسکری کاوشوں سے بھی آگاہ کیا گیا۔
سپہ سالار نے سول انتظامیہ کے نمائندوں سے بات چیت کے دوران اچھی حکمرانی، بنیادی ڈھانچے کی ترقی اور عوامی شمولیت پر مبنی پالیسیوں کی ضرورت پر زور دیا۔انہوں نے کہا کہ بلوچستان کے عوام کی ترقی اور خوشحالی مشترکہ کوششوں سے ہی ممکن ہے۔
فیلڈ مارشل عاصم منیر نے یہ بھی واضح کیا کہ پاکستان آرمی بلوچستان کے عوام کے شانہ بشانہ کھڑی ہے اور خطے میں امن، خوشحالی اور پائیدار ترقی کیلیے ہر ممکن تعاون جاری رکھا جائے گا۔
فوجی جوانوں سے خطاب کرتے ہوئے سپہ سالار نے ان کے بلند حوصلے، آپریشنل تیاری اور مادرِ وطن کے دفاع میں غیر متزلزل عزم کو سراہا۔انہوں نے کہا کہ مشکل حالات کے باوجود فوجی جوانوں نے خطے میں امن و استحکام قائم رکھنے میں مرکزی کردار ادا کیا ہے۔تربت آمد پر کور کمانڈر بلوچستان نے آرمی چیف کا استقبال کیا۔
مزید پڑھیں: آج کا ڈالر ریٹ پاکستان میں کیا ہے؟
