اسلام آباد(اے بی این نیوز)بانی پی ٹی آئی عمران خان اور ان کی اہلیہ بشریٰ بی بی کی درخواست ضمانتوں سے متعلق ضلعی عدالت میں سماعت ہوئی۔
ایڈیشنل سیشن جج محمد افضل مجوکہ نےبانی پی ٹی آ ئی عمران خان کے خلاف جعلی رسیدوں کے کیس سمیت پانچ مقدمات میں درخواست ضمانت کی سماعت کی۔
بانی پی ٹی آ ئی عمران خان کے وکیل خالد یوسف عدالت میں پیش ہوئے ، وکیل خالد یوسف کا کہنا تھا کہ امید ہے آج بانی پی ٹی آئی کو عدالت میں پیش کیا جائے گا کیونکہ عدالتی حکم بھی یہی ہے۔
جج نے ریمارکس دیئے کہ بانی پی ٹی آئی کی پیشی کی کوشش تو میں نے بھی کی مگر کیا جیل حکام نے کوئی لیٹر لکھا؟ جس پر عدالتی عملے نے جواب دیا کہ جی، ایک لیٹر آیا ہے۔
جج نے استفسار کیا کہ پھر ویڈیو لنک کی کیا صورتحال ہے؟ عدالتی عملے نے جواب دیا کہ جیل حکام سے چیک کرتے ہیں۔جج نے وکیل سے مکالمہ کرتے ہوئے کہا کہ انتظار کریں، ویڈیو لنک کا چیک کرتے ہیں۔
اس دوران عدالت نے سماعت میں وقفہ کر دیا اور ہدایت کی کہ عدالتی عملہ جیل حکام سے ویڈیو لنک پر حاضری کیلئے رابطہ کرے۔
اڈیالہ جیل حکام نے عدالتی عملے کو بتایا کہ انٹرنیٹ کی خرابی کے باعث بانی پی ٹی آئی کو ویڈیو لنک پر پیش نہیں کیا جا سکتا، عدالتی عملے نے جج افضل مجوکہ کو جیل حکام کے جواب سے آگاہ کردیا۔
