کراچی ( اے بی این نیوز )ایم کیو ایم پاکستان کے چیئرمین خالد مقبول صدیقی کی ہدایت پر تنظیمی امور سے متعلق نوٹیفکیشن جاری کیا گیا ہے جس میں مختلف رہنماؤں کو مختلف ذمہ داریاں سونپی گئی ہیں۔
نوٹیفکیشن کے مطابق، ڈاکٹر خالد مقبول صدیقی تمام تنظیمی اور پالیسی امور کی نگرانی کریں گے۔ سینٹرل آرگنائزنگ کمیٹی میں فاروق ستار، انیس قائم خانی اور امین الحق شامل ہوں گے، جبکہ تنظیمی کمیٹی کی ذمہ داریاں انیس قائم خانی، امین الحق اور رضوان بابر کے پاس ہوں گی۔مزید برآں، لیبر ڈویژن کی نگرانی مصطفیٰ کمال، فیصل سبزواری اور رضوان بابر کریں گے، شعبہ خواتین کی ذمہ داریاں نسرین جلیل، انیس قائم خانی اور کیف الوریٰ کے پاس ہوں گی، جبکہ یوتھ فورم کی ذمہ داری فاروق ستار، مصطفیٰ کمال اور فیصل سبزواری پر ہوگی۔
سوشل میڈیا شعبے کی ذمہ داریاں مصطفیٰ کمال اور فاروق ستار کے پاس ہوں گی، جبکہ بزنس فورم مصطفیٰ کمال، فاروق ستار اور فیصل سبزواری کے ماتحت کام کرے گا۔ اے پی ایم ایس او کے امور کی نگرانی امین الحق اور فیصل سبزواری کریں گے، اور ترقیاتی پیکج کے لیے ڈیولپمنٹ کمیٹی میں مصطفیٰ کمال اور فاروق ستار شامل ہیں۔فاروق ستار نے اس نوٹیفکیشن کی تصدیق کرتے ہوئے کہا کہ خالد مقبول کی جانب سے جاری کردہ سرکلر بالکل درست اور تصدیق شدہ ہے، اور مرکزی کمیٹی کے 11 اراکین کے اتفاق رائے کے بعد یہ ہدایت نامہ جاری کیا گیا ہے۔ اگر کسی کو اس کے بعد اختلاف ہے تو وہ پارٹی کے اندر رہ کر اپنی رائے کا اظہار کر سکتا ہے۔
