کراچی ( اے بی این نیوز )رمضان المبارک کے آغاز سے پہلے ہی کراچی کی مارکیٹوں میں چینی کی قیمتوں میں غیر معمولی اضافہ ہو گیا ہے۔ شہر میں 10 دن کے دوران چینی کی فی کلو قیمت میں 20 روپے کا اضافہ کیا گیا ہے، جس کے باعث شہری 150 روپے فی کلو قیمت پر چینی خریدنے پر مجبور ہیں۔
رپورٹس کے مطابق کراچی کی مارکیٹ میں سٹے باز واٹس ایپ گروپس کے ذریعے قیمتوں کا تعین کر رہے ہیں، اور ایکسپورٹ کی آڑ میں اسمگلنگ اور سٹے بازی کے معاملات سامنے آ رہے ہیں۔ شوگر ڈیلرز نے خدشہ ظاہر کیا ہے کہ رمضان تک چینی کی قیمت فی کلو 170 روپے تک جا سکتی ہے۔ ان کا کہنا تھا کہ اگر ایف آئی اے چھاپے مارے تو چینی کی قیمت میں ایک دن میں 10 روپے فی کلو کمی ہو سکتی ہے۔
دوسری طرف لاہور میں بھی چینی کی قیمتوں میں اضافہ دیکھنے کو ملا ہے۔ ایک ہفتے کے دوران چینی کی فی کلو قیمت 12 روپے بڑھ گئی ہے، اور 50 کلو والا تھیلا 600 روپے اضافے کے بعد 7,400 روپے تک پہنچ چکا ہے۔ ہول سیل قیمتیں 136 روپے سے بڑھ کر 148 روپے فی کلو ہوگئی ہیں، جبکہ پرچون میں چینی 150 روپے فی کلو فروخت ہو رہی ہے۔
