اسلام آباد ( اے بی این نیوز ) 7سے 25 دسمبر تک راولپنڈی کرکٹ اسٹیڈیم راولپنڈی میں کھیلے جانے والے چیمپئنز ٹی ٹوئنٹی کپ کے ٹکٹوں کی فروخت جمعرات 5 دسمبر سے شروع ہو گی۔ ٹکٹ آن لائن pcb.tcs.com.pk سے خریدے جاسکتے ہیں جبکہ فزیکل ٹکٹس راولپنڈی اور اسلام آباد کے نامزد ٹی سی ایس آؤٹ لیٹس پر دستیاب ہوں گے۔
پانچ ٹیموں کے چیمپئنز ٹی ٹوئنٹی کپ میں شائقین کو اعلیٰ معیار کی کرکٹ دیکھنے کی ترغیب دینے کیلئے پریمیم انکلوژرز (میراں بخش، شعیب اختر، سہیل تنویر اور یاسر عرفات) میں 22 میں سے 20 میچوں میں داخلہ مفت کر دیا گیا ہے۔ کوالیفائر کے لیے 23 دسمبر کو اور فائنل کے لیے 25 دسمبر کو پریمیم انکلوژرز میں ٹکٹ بالترتیب 100 اور 250 روپے میں خریدے جا سکتے ہیں۔
وی آئی پی انکلوژرز (عمران خان اور جاوید میانداد) کے ٹکٹ سنگل ہیڈر میچ کے لیے 200 اور 250 روپے سے شروع ہوتے ہیں جبکہ ڈبل ہیڈرز کے لیے وی آئی پی ٹکٹ 300 روپے اور 400 روپے میں خریدے جا سکتے ہیں۔ VIP انکلوژر میں فائنل کا ٹکٹ 500 روپے میں خریدا جا سکتا ہے۔
شائقین راولپنڈی کرکٹ اسٹیڈیم کی گیلری سے بھی ایکشن دیکھ سکتے ہیں جہاں سنگل ہیڈر میچز کے ٹکٹ کی قیمت 650 سے 700 روپے ہے جبکہ چھ ڈبل ہیڈرز میچوں کے لیے 800 روپے ہے۔ کوالیفائر کے لیے گیلری ٹکٹ کی قیمت 700 روپے فی فرد ہوگی جبکہ شائقین گیلری کے 25 دسمبر کے فائنل کے ٹکٹ 1,000 روپے میں خرید سکتے ہیں۔
مزید پڑھیں :چیمپئنز ٹرافی کے لیے ہائبرڈ ماڈل پہلے سے ترتیب دیا گیا تھا،شعیب اختر کا دعویٰ
