اسلام آباد(نیوزڈیسک)وزیرِ اعظم شہباز شریف کے کوآرڈینیٹر برائے صحت ڈاکٹر ملک مختار نے کہا ہے کہ منکی پاکس کی علامات 4 سے 15 روز میں ظاہر ہوتی ہیں، اگر کسی میں علامات ظاہر ہوں تو اسے آئیسولیٹ ہونا چاہیے۔

میڈیا سے گفتگو کرتے ہوئے ڈاکٹر ملک مختار نے کہا کہ وزیرِ اعظم کی صدارت میں منکی پاکس سے متعلق اہم اجلاس ہوا، جس میں ٹیسٹنگ لیبارٹریز، کٹ اور ادویات سے متعلق بریفنگ دی گئی۔

انہوں نے کہا کہ وزیرِ اعظم کو ایئر پورٹس اور بارڈر پر انتظامات سے متعلق آگاہ کیا گیا، منکی پاکس کی جنوبی افریقا میں انسانوں میں تشخیص 1970ء ہوئی تھی۔

ڈاکٹر ملک مختار احمد کا کہنا ہے کہ آج تک دنیا میں منکی پاکس 99 ہزار لوگوں میں پازیٹو آیا ہے، پاکستان میں منکی پاکس کا پہلا کیس 11 اپریل 2023ء میں سامنے آیا تھا۔

ان کا یہ بھی کہنا ہے کہ منکی پاکس کے 90 سے 95 فیصد مریض صحتیاب ہو جاتے ہیں۔