اسلام آباد(نیوز ڈیسک ) اسلام آباد کی ڈسٹرکٹ اینڈ سیشن عدالت نے پیر کو سابق وزیراعظم عمران خان، سابق وفاقی وزیر شاہ محمود قریشی اور دیگر کو حقیقی آزادی مارچ کے دوران درج دو مقدمات میں بری کردیا۔
مزید پڑھیں :پاکستان میں آج بروز پیر 3 جون 2024سونے کا ریٹ
تفصیلات کے مطابق اسلام آباد کی ڈسٹرکٹ اینڈ سیشن عدالت نے پاکستان تحریک انصاف (پی ٹی آئی) کی قیادت کے خلاف آزادی مارچ کے دوران توڑ پھوڑ اور دفعہ 144 کی خلاف ورزی پر دائر دو مقدمات کی سماعت کی۔
سماعت کے دوران پی ٹی آئی رہنما علی محمد خان، نعیم حیدر پنجوٹھا، سردار مسروف ایڈووکیٹ، آمنہ علی ایڈووکیٹ سابق وزیر اسد عمر کے ہمراہ عدالت میں پیش ہوئے۔بعد ازاں عدالت نے عمران خان، شاہ محمود قریشی، اسد عمر، علی محمد خان، مراد سعید کو بری کردیا۔
خیال رہے کہ عمران خان، شاہ محمود اور دیگر رہنماؤں کے خلاف تھانہ گولڑہ میں 2022 میں دو مقدمات درج کیے گئے تھے۔واضح رہے کہ مارچ میں اسلام آباد کی ڈسٹرکٹ اینڈ سیشن عدالتوں نے عمران خان اور عوامی لیگ کے سربراہ شیخ رشید احمد سمیت 11 ملزمان کو لانگ مارچ کے دوران احتجاج اور توڑ پھوڑ کے دو مزید مقدمات سے بری کر دیا تھا۔
مئی 2022 میں اسلام آباد میں ختم ہونے والے پی ٹی آئی کے لانگ مارچ کے تناظر میں، ملک بھر میں پولیس نے پی ٹی آئی کے رہنماؤں اور کارکنوں کے خلاف دفعہ 144 سمیت سنگین خلاف ورزیوں پر درجنوں مقدمات درج کیے تھے۔جڑواں شہروں میں، دارالحکومت میں پولیس نے پی ٹی آئی کے رہنماؤں اور کارکنوں کے خلاف قانون نافذ کرنے والوں کے خلاف مزاحمت کرنے اور میٹرو بس اسٹیشنوں کو آگ لگانے سمیت ریاستی املاک کو نقصان پہنچانے پر کم از کم تین مقدمات درج کیے تھے۔
