اسلام آباد(نیوزڈیسک) توشہ خانہ کیس میں سابق وزیرِ اعظم نواز شریف کا بیان ریکارڈ کرنے کی درخواست منظور ۔سابق صدر آصف زرداری، سابق وزیراعظم نواز شریف اورسابق وزیراعظم یوسف رضا گیلانی کے خلاف توشہ خانہ کیس کی سماعت ہوئی۔نواز شریف اور یوسف رضا گیلانی کی جانب سے پلیڈر عدالت میں پیش ہوئے۔سابق وزیراعظم نواز شریف کے وکیل قاضی مصباح بھی احتساب عدالت میں پیش ہوئے۔وکیلِ صفائی نے کہا کہ نیب کو ہدایت کی جائے کہ نواز شریف کا بیان ریکارڈ کیا جائے۔جج محمد بشیر نے سوال کیا کہ نواز شریف کو بلا کر بیان ریکارڈ کروانے میں کیا مسئلہ ہے؟ نیب کے پراسیکیوٹر نے کہا کہ تفتیشی افسر بیان ریکارڈ کر لیں، ہمیں کوئی مسئلہ نہیں۔وکیلِ صفائی قاضی مصباح نے کہا کہ ہمیں بیان کے لیے سوالنامہ دیں، ہم جواب جمع کروا دیں گے۔جج محمد بشیر نے نواز شریف کا بیان ریکارڈ کرنے کی درخواست منظور کر لی۔وکیل صفائی قاضی مصباح نے کہا کہ نواز شریف کی عدم موجودگی پر ریفرنس فائل ہوا تھا، وہ اب سماعت میں شامل بھی ہو چکے ہیں۔احتساب عدالت نے نیب کو 30 نومبر تک نواز شریف کا بیان ریکارڈ کرنے کی ہدایت کر دی۔
