لاہور(نیوزڈیسک) میڈیا ایڈوائزر چیئرمین پی ٹی آئی فیاض الحسن چوہان نے مریم صفدر کی پاکستان واپسی پر اپنا ردعمل دیتے ہوئے کہا کہ فواد چوہدری اور دیگر پی ٹی آئی قائدین کی گرفتاریوں کی وجہ بیگم صفدر اعوان کی واپسی ہے۔ مفرور الدین نواز شریف اور ڈاکو رانی بیگم صفدر پنجاب میں اپنی مرضی کا سیاسی میدان چاہتے ہیں۔سنجھیاں ہو جان گلیاں وچ مرزا یار پھرے کے مصداق شریف خاندان اکیلا الیکشن لڑ کے جیتنا چاہتا ہے۔ فیاض الحسن چوہان نے کہا کہ امپورٹڈ اور نگران حکومت آل شریف کی خواہشات پوری کرنے کیلئے ہر حد تک گر رہی ہے۔ فیاض الحسن پی ٹی آئی قیادت اور کارکنان پر مظالم کے پہاڑ ڈھائے جا رہے ہیں۔
عقل کے اندھےحکمران ایسے اقدامات سے صرف عمران خان کی مقبولیت میں اضافے کا باعث بن رہے ہیں۔انہو نے کہا کہ وقتی طور پر بیگم صفدر کو اس سیاسی ماحول میں بہت مزا آئے گا۔جب الیکشن کا بگل بجے گا، آل شریف کے دامن میں رسوائی اور جگ ہنسائی کے سوا کچھ نہیں آئے گا۔پی ٹی آئی کارکنان اور قائدین عمران خان کی خاطر ہر قربانی دینے کو تیار ہیں۔ تحریک انصاف امپورٹڈ حکومت اور آل شریف کے فاشزم کا پوری دلیری سے مقابلہ کرے گی۔ آئندہ انتخابات میں آل شریف لاہور میں بھی منہ چھپاتی پھرے گی۔
