نئی دہلی(نیوزڈیسک) ڈپریشن کے شکار بھارتی شخص نے 50 سے زائد ریزر بلیڈ نگل لئے۔ راجستھان سے تعلق رکھنے والا 26 سالہ یشپال سنگھ جو پیشے کے لحاظ سے اکاؤنٹنٹ ہے کچھ عرصے سے ڈپریشن کا شکار تھا، یشپال سنگھ نےڈپریشن میں 50 سے زائد ریزر بلیڈ نگل لئے۔یہ واقعہ جلور ضلع میں اس وقت سامنے آیا جب یشپال نے پیٹ میں درد کے باعث خون کی اُلٹی کی۔رپورٹس کے مطابق خون کی اُلٹی ہونے پر یشپال کا روم میٹ اسے فوراً ہسپتال لے گیا جہاں ایکسرے میں اس کے جسم کے اندر بلیڈ ظاہر ہوئے تاہم ڈاکٹروں نے اینڈو سکوپی کی اور فوری طور پر سرجری کرنے کا فیصلہ کیا۔سرجری کرنے والے ڈاکٹروں کے مطابق اس شخص کی گردن پر شدید کٹ کے نشانات تھے اور پورے جسم پر سوجن تھی جبکہ جسم کے اندر بھی کئی جگہوں پر کٹ تھے تاہم 7 ڈاکٹروں پر مشتمل ٹیم نے سرجری کر کے 3 گھنٹے میں پیٹ سے تمام بلیڈ نکال لئے۔ڈاکٹروں کا کہنا ہے کہ اس شخص نے ریزر بلیڈ کو درمیان سے توڑا اور ایک ایک کر کے پلاسٹک سمیت ہی کھا لئے، ممکن ہے کہ نوجوان کو بے چینی یا ذہنی دباؤ تھا، جس کی وجہ سے اس نے بلیڈ کے 3 پورے پیکٹ کھا لئے۔کامیاب آپریشن اور جسم سے ریزر بلیڈ نکلنے کے بعد مریض کی حالت اب بہتر ہے۔