لندن ( اے بی این نیوز) سابق پریمیئر لیگ فٹبالر اور تجزیہ کار جیرمین پیننٹ کتے کے حملے میں شدید زخمی ہوگئے، جس کے بعد ان کی ٹانگ پر 50 سے زائد ٹانکے لگانے پڑے۔ سابق آرسنل اور لیورپول کھلاڑی کے مطابق ان کے پالتو کتے کنگ نے حملے کے دوران ان کی جان بچانے میں اہم کردار ادا کیا۔
43 سالہ جیرمین پیننٹ اپنے امریکن اکیٹا نسل کے کتے کنگ کو سیر کروا رہے تھے کہ اسی دوران ایک جرمن شیفرڈ نے ان کے پالتو کتے پر حملہ کردیا۔ کنگ کو بچانے کی کوشش میں جیرمین بھی حملے کی زد میں آگئے۔
برطانوی اخبار دی سن سے گفتگو کرتے ہوئے جیرمین پیننٹ نے بتایا کہ واقعہ انتہائی خوفناک تھا۔ ان کے مطابق دوسرے کتے نے پہلے کنگ پر حملہ کیا، جس پر وہ اپنے پالتو کتے کو بچانے کے لیے آگے بڑھے، لیکن اگلے ہی لمحے حملہ آور کتا ان پر جھپٹ پڑا۔
جیرمین کے مطابق وہ زمین پر گر گئے اور حملہ آور کتے نے تقریباً پانچ سیکنڈ تک ان کی ٹانگ کو اپنے جبڑوں میں جکڑے رکھا، جس کے باعث انہیں شدید تکلیف کا سامنا کرنا پڑا۔
سابق فٹبالر نے بتایا کہ ان کا پالتو کتا کنگ انہیں بچانے کے لیے فوراً آگے بڑھا اور دونوں کتوں کے درمیان شدید لڑائی شروع ہوگئی۔ کنگ اس وقت تک ان کے ساتھ ڈٹا رہا جب تک مدد نہیں پہنچ گئی۔
جیرمین پیننٹ نے اپنے پالتو کتے کی بہادری کو سراہتے ہوئے کہا کہ کنگ نے ان کی جان بچائی۔ ان کے مطابق اگر ان کا پالتو کتا چھوٹے قد کا ہوتا تو ممکن ہے کہ وہ اس حملے سے بچ نہ پاتے۔
واقعے کے بعد سابق فٹبالر کی ٹانگ پر 50 سے زائد ٹانکے لگائے جانے کی اطلاع سامنے آئی ہے۔
مزید پڑھیں:پی سی بی کا صائم ایوب سے متعلق بڑا فیصلہ، صاحبزادہ فرحان کو طلب کرلیا
