بنوں(ویب ڈیسک) خیبرپختونخوا کے ضلع بنوں میں نامعلوم مسلح افراد کی فائرنگ سے جماعت اسلامی کے مقامی رہنما محمد روشان جاں بحق ہو گئے۔ یہ افسوسناک واقعہ تھانہ سٹی کی حدود میں پیش آیا، جہاں مسلح افراد نے اچانک فائرنگ کی، جس کے نتیجے میں محمد روشان شدید زخمی ہو گئے اور زخموں کی تاب نہ لاتے ہوئے موقع پر ہی دم توڑ گئے۔
پولیس ذرائع کے مطابق جاں بحق محمد روشان، خواجہ مد منڈان کے جنرل سیکرٹری تھے اور علاقے میں ایک متحرک سماجی و سیاسی شخصیت کے طور پر جانے جاتے تھے۔ ان کی قیادت میں جماعت اسلامی کئی سماجی اور سیاسی سرگرمیوں میں حصہ لے رہی تھی۔
واقعے کے بعد پولیس اور دیگر قانون نافذ کرنے والے ادارے فوری طور پر جائے وقوعہ پر پہنچے، شواہد اکٹھے کیے اور تحقیقات کا آغاز کیا۔ لاش کو ضروری قانونی کارروائی کے لیے ڈسٹرکٹ ہیڈکوارٹر ہسپتال منتقل کیا گیا، جہاں پوسٹ مارٹم کے بعد میت کو ورثا کے حوالے کیا جائے گا۔
اس افسوسناک واقعے کے بعد علاقے میں سیکیورٹی سخت کر دی گئی ہے اور داخلی و خارجی راستوں پر ناکہ بندی بھی کی گئی ہے تاکہ مزید کسی ناخوشگوار واقعے کو روکا جا سکے۔ پولیس نے عوام سے اپیل کی ہے کہ وہ کسی بھی مشکوک سرگرمی کی اطلاع فوری طور پر حکام کو دیں تاکہ تحقیقات میں مدد مل سکے۔
مزید پڑھیں:راولپنڈی میں دفعہ 144 نافظ کردی گئی
