مری ( اے بی این نیوز )مری اور گلیات میں شدید برفباری نے معمولاتِ زندگی مفلوج کر دیے ہیں، جس کے باعث انتظامیہ نے سیاحوں کے داخلے پر پابندی عائد کر دی ہے۔ موسمی صورتحال کے پیش نظر گلیات اور مری کے تمام داخلی راستوں پر پولیس کی نفری تعینات کر دی گئی ہے جبکہ سیاحوں کو واپس بھیجا جا رہا ہے۔ضلعی انتظامیہ ایبٹ آباد کے مطابق سیاحوں کی حفاظت اولین ترجیح ہے اور برفباری کے باعث راستوں کے بند ہونے کا شدید خدشہ ہے، اس لیے شہریوں کو متبادل راستوں اور خراب موسم میں سفر سے گریز کرنے کی ہدایت کی گئی ہے۔
ادھر ملکہ کوہسار مری اور گردونواح میں بھی وقفے وقفے سے برفباری کا سلسلہ جاری ہے۔ شدید برفباری اور سڑکوں کی بندش کے باعث برف دیکھنے آنے والے سیاحوں کا داخلہ روک دیا گیا ہے جبکہ مری میں اشیائے خوردونوش کی سپلائی کرنے والی گاڑیوں کا داخلہ بھی بند کر دیا گیا ہے۔شہر میں بجلی کی فراہمی بھی متاثر ہے اور کئی نواحی علاقوں میں دو دن سے بجلی غائب ہے۔ معروف سیاحتی مقام کشمیر پوائنٹ میں بھی دو روز سے بجلی کی بندش جاری ہے، جس سے مقامی آبادی اور سیاحوں کو شدید مشکلات کا سامنا ہے۔
دوسری جانب وزیر اطلاعات پنجاب عظمیٰ بخاری نے مری کا سفر کرنے والے شہریوں کے لیے خصوصی پیغام جاری کرتے ہوئے کہا ہے کہ مری میں تمام ہوٹل مکمل فل ہو چکے ہیں اور گنجائش سے زیادہ گاڑیاں داخل ہو چکی ہیں۔ انہوں نے واضح کیا کہ اب مزید گاڑیوں کے داخلے کی گنجائش نہیں رہی، اس لیے شہری مری کا سفر کرنے سے گریز کریں۔وزیر اطلاعات کے مطابق مری میں پہلے ہی سیاحوں کی بڑی تعداد موجود ہے اور حکومت کی اولین ترجیح سیاحوں کی حفاظت ہے، اسی لیے شہریوں سے اپیل کی گئی ہے کہ وہ خراب موسم کے دوران مری اور گلیات کا رخ نہ کریں۔شدید برفباری، بند سڑکیں، بجلی کی بندش اور محدود سہولیات کے باعث مری اور گلیات اس وقت ہائی الرٹ پر ہیں جبکہ انتظامیہ صورتحال پر مسلسل نظر رکھے ہوئے ہے۔
