لاہور(اے بی این نیوز) وزیر تعلیم پنجاب رانا سکندر حیات نے تعلیمی اداروں میں موسمِ سرما کی چھٹیوں میں مزید اضافے سے متعلق قیاس آرائیوں کو مسترد کردیا۔یہ اعلان شدید سردی کے باعث تعلیمی اداروں کی بندش کے بعد پیدا شدہ ابہام کے خاتمے کے لیے کیا گیا ہے۔
تفصیلات کے مطابق پنجاب کے وزیر تعلیم سکندر حیات نے تعلیمی اداروں کی چھٹیوں میں اضافے کی خبروں پر واضح کیا کہ صوبے کے تمام سرکاری اور نجی اسکول 19 جنوری سے دوبارہ کھلیں گے۔
وزیر تعلیم نے بتایا کہ موسمِ سرما کی تعطیلات 20 دسمبر سے شروع ہوئی تھیں اور طلبہ کو مجموعی طور پر 30 دن کی چھٹی دی گئی تھی، اب تک بچے 27 دن کی تعطیلات سے لطف اندوز ہو چکے ہیں اور مزید توسیع نہیں دی جائے گی۔انہوں نے کہا کہ حکومت نے محکمہ ماحولیات اور پی ڈی ایم اے کے ساتھ ملکر موسم کی پیش گوئیوں اور درجہ حرارت کے اعداد و شمار کا تفصیلی جائزہ لیا اور آئندہ ہفتے کے موسمی حالات کو مدنظر رکھتے ہوئے یہ فیصلہ کیا گیا ہے کہ اسکول کھولے جائیں گے۔
لاہور میں دھند اور سرد ہوا نے روزمرہ زندگی سست کر دی ہے۔ ہوا کی رفتار 2 کلومیٹر فی گھنٹہ ریکارڈ کی گئی، جبکہ شہر کا ایئر کوالٹی انڈیکس 186 ریکارڈ کیا گیا، جو عالمی سطح پر چھٹے نمبر پر آلودگی کی سطح ظاہر کرتا ہے۔محکمہ موسمیات کے مطابق بڑے شہروں میں درمیانی سے گہری دھند اور پوٹھوہار میں صبح کے وقت ہیز کی پیش گوئی ہے۔
پنجاب پروونشل ڈیزاسٹر مینجمنٹ اتھارٹی نے صوبے میں شدید بارش، برفباری اور درجہ حرارت میں کمی کی وارننگ جاری کی ہے۔ایک مغربی ہوا کا نظام 16 سے 19 جنوری کے دوران داخل ہوگا۔ 20 سے 23 جنوری کے دوران مری، گلیات اور دیگر پہاڑی علاقوں میں بارش اور برفباری متوقع ہے، جبکہ لاہور، سرگودھا، گوجرانوالہ، ساہیوال، ملتان، فیصل آباد، ڈیرہ غازی خان اور بہاولپور سمیت زیادہ تر پنجاب کے اضلاع میں بھی بارش کی پیش گوئی کی گئی ہے۔
مزید پڑھیں،متحدہ عرب امارات میں آج جنگی جہازوں کا فضائی مارچ ہوگا
