اسلام آباد (اے بی این نیوز) سابق سینیٹر مشتاق احمد خان نے نئی سیاسی جماعت پاکستان رائٹس موومنٹ کی بنیاد رکھ دی۔
اسلام آباد میں میڈیا بریفنگ میں مشتاق احمد خان نے کہا کہ پاکستان رائٹس موومنٹ 1973 کے آئین کے مطابق پاکستان کی تشکیل نو اور تعمیر نو کرے گی۔ 1973 کا آئین ایک نعمت ہے، اسے بنانے والوں کو خراج تحسین پیش کرتا ہوں۔ آئین پر عمل کر کے ہم پاکستان کو اسلامی، جمہوری، فلاحی ریاست بنا سکتے ہیں۔
مشتاق احمد خان نے کہا کہ 1973 کے آئین نے اسلام کا مسئلہ حل کر دیا، اس آئین میں لکھا تھا کہ حاکمیت اللہ کی ہے۔ آئین میں لکھا ہے کہ سپریم قانون قرآن و سنت ہو گا، اس آئین میں وزیراعظم اور صدر کے لیے مسلمان ہونا اور اہم عہدوں پر آنے والوں کے لیے ختم نبوت کا حلف اٹھانا لازمی ہے۔
انہوں نے کہا کہ ہم ایسا پاکستان چاہتے ہیں جہاں آمریت نہ ہو، جہاں ہائبرڈ جمہوریت نہ ہو، ہم ایسا پاکستان چاہتے ہیں جہاں حقیقی جمہوریت اور ووٹ کا تقدس ہو، ایسا پاکستان جہاں بولنے کی سزا نہ ہو، زبان کی پابندی نہ ہو، ایسا پاکستان جہاں آزاد اور فوری انصاف ہو، ایسا پاکستان جہاں اقلیتیں خوفزدہ نہ ہوں اور اپنے حقوق سے محروم نہ ہوں۔
مشتاق احمد خان نے مزید کہا کہ ہم پاکستان ایک ایسا ملک چاہتے ہیں جہاں جبری گمشدگی نہ ہو اور فوجی آپریشن نہ ہو، ایسا پاکستان ہو جہاں مسخ شدہ لاشیں نہ ملیں، ایسا پاکستان جو فلسطین اور کشمیر کی آزادی کے لیے فرنٹ لائن کا کردار ادا کرے، ایسا پاکستان جہاں ڈاکٹر عافیہ امریکا کی قید میں نہ ہو، پاکستان ایک فلاحی اسلامی جمہوری ریاست ہے، ہم اپنی سیاسی جماعتوں کے حقوق کے لیے جدوجہد کا آغاز کر رہے ہیں۔
مزید پڑھیں:بروقت فنڈز نہ ملنے سے 2025-26 کا مالی ہدف خطرے میں، مشیر خزانہ خیبرپختونخوا
