لاہور (اے بی این نیوز) پنجاب حکومت نے بیرون ملک ملازمت کے خواہشمند نوجوانوں کے لیے مالی امداد کا اعلان کر دیا۔
پنجاب حکومت نے پرواز کارڈ پروگرام کے تحت بیرون ملک ملازمت کے خواہشمند ایک لاکھ افراد کے لیے بلاسود مالی امداد کا اعلان کیا ہے تاکہ وہ بیرون ملک جا کر اپنے روزگار کے خوابوں کو حقیقت میں بدل سکیں۔
اس پروگرام سے مستفید ہونے والوں کے لیے اہلیت کا معیار یہ ہے کہ 18 سال یا اس سے زیادہ عمر کے لوگ جو بیرون ملک جانا چاہتے ہیں، ان کا ڈومیسائل پنجاب میں ہونا چاہیے، اور بیرون ملک سے جائز ملازمت کی پیشکش والے افراد بھی اس سہولت سے فائدہ اٹھا سکتے ہیں۔
پروگرام کے تحت اہل افراد کو بلاسود قرضے فراہم کیے جائیں گے جس سے وہ سفری اخراجات اور دیگر ضروریات پوری کر سکیں گے۔
حکومتی ذرائع کے مطابق ’’پرواز کارڈ پروگرام‘‘ سے صوبے کے ہزاروں نوجوانوں کو معاشی استحکام حاصل کرنے میں مدد ملے گی۔ اس اقدام کا مقصد نہ صرف روزگار کے مواقع فراہم کرنا ہے بلکہ ترسیلات زر میں اضافہ کرکے ملکی معیشت کو مضبوط کرنا ہے۔
ذرائع کا کہنا ہے کہ اس منصوبے پر جلد عمل درآمد شروع ہو جائے گا اور اس کے لیے شفاف درخواست اور منظوری کا نظام متعارف کرایا جائے گا تاکہ مالی امداد صرف مستحق اور اہل امیدواروں تک پہنچ سکے۔
پروگرام کی مزید تفصیلات کے لیے اس لنک پر کلک کریں۔
https://parwaaz.psdf.org.pk/
مزید پڑھیں:بڑی خوشخبری، بی آئی ایس پی کے اہل افراد کے لیے نیا حکومتی اعلان
