راولپنڈی (اے بی این نیوز) چیف آف ڈیفنس فورسز فیلڈ مارشل سید عاصم منیر نے راولپنڈی کے کرائسٹ چرچ میں کرسمس کی تقریبات میں شرکت کی اور مسیحی برادری کے ساتھ خوشیاں بانٹیں۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل نے مسیحی برادری کو کرسمس کی دلی مبارکباد پیش کی اور امن، ہم آہنگی اور خوشحالی کے لیے نیک خواہشات کا اظہار کیا۔
فیلڈ مارشل نے قائداعظم محمد علی جناح کو خراج عقیدت پیش کرتے ہوئے مساوات، آزادی اور مذہبی رواداری کے ان کے وژن کو اجاگر کیا اور کہا کہ اقلیتوں کے حقوق کا تحفظ نظریہ پاکستان کی بنیادی اساس ہے۔
چرچ میں موجود لوگوں سے گفتگو کرتے ہوئے فیلڈ مارشل نے پاکستانی مسیحیوں کی ملک کی ترقی اور سلامتی کے لیے دیرینہ خدمات کو سراہا جن میں افواج پاکستان میں ان کی قابل فخر اور ممتاز خدمات بھی شامل ہیں۔
بین المذاہب ہم آہنگی، باہمی احترام اور اتحاد کی اہمیت پر زور دیتے ہوئے انہوں نے کہا کہ پاکستان کی طاقت اس کے تنوع، مساوی مواقع اور آئینی اقدار میں ہے جو مذہب، نسل، ذات پات اور عقیدے سے بالاتر ہیں۔
آئی ایس پی آر کے مطابق آرمی چیف اور چیف آف ڈیفنس فورس نے اس بات کا اعادہ کیا کہ پاکستان کی مسلح افواج آئین پاکستان کے تحت تمام شہریوں کے وقار، سلامتی اور مساوی حقوق کے تحفظ کے لیے پرعزم ہیں۔
فیلڈ مارشل سید عاصم منیر نے راولپنڈی میں کرسمس کی تقریبات میں شرکت کر کے مسیحی برادری کو مبارکباد دی اور امن، ہم آہنگی و خوشحالی کی خواہشات کا اظہار کیا۔ انہوں نے قائداعظم کے وژن برابری، آزادی اور مذہبی رواداری کو اجاگر کرتے ہوئے اقلیتوں کے حقوق کے تحفظ پر زور دیا۔ pic.twitter.com/I4xZTms7Wb
— zarmeena khan (@shehzadikhan47) December 25, 2025
بیان کے مطابق مسیحی برادری کے رہنماؤں نے فیلڈ مارشل کے دورے پر اظہار تشکر کیا اور وطن کے دفاع، شمولیت، مذہبی ہم آہنگی اور قومی یکجہتی کے فروغ میں افواج پاکستان کے کردار کو سراہا۔
مزید پڑھیں:پی آئی اے کا برطانیہ کیلئے اپنے فلائٹ آپریشن میں توسیع کا اعلان
