لاہور (اے بی این نیوز) آئی ایل ٹی ٹوئنٹی کے چیف ایگزیکٹو ڈیوڈ وائٹ کا کہنا ہے کہ انہیں پاکستانی کھلاڑیوں سے خاص لگاؤ ہے، مستقبل میں مزید پاکستانیوں کو لیگ کھیلتے دیکھنا چاہتے ہیں۔
دبئی سےنجی ٹی وی کو دیئے گئے خصوصی انٹرویو میں ڈیوڈ وائٹ نے کہا کہ فخر زمان، حسن نواز اور نسیم شاہ اس سیزن میں ہماری لیگ کا حصہ ہیں۔
انہوں نے کہا کہ فرنچائزز کو بابر اعظم سمیت کسی بھی پاکستانی کھلاڑی کو منتخب کرنے کا حق ہے لیکن ذاتی طور پر مجھے پاکستانی کرکٹرز سے خاص لگاؤ ہے۔
پی ایس ایل اور آئی ایل ٹی ٹوئنٹی کی فاتح ٹیموں کے درمیان ممکنہ نمائشی میچ کے حوالے سے ڈیوڈ وائٹ کا کہنا تھا کہ کرکٹ میں سب کچھ ممکن ہے، دونوں لیگز کی فاتح ٹیموں کے درمیان مقابلہ ایک شاندار اور منفرد تجربہ ہوسکتا ہے۔
انہوں نے کہا کہ آئی ایل ٹی ٹوئنٹی 20 انتظامیہ کے پاکستان کرکٹ بورڈ کے ساتھ قریبی تعلقات ہیں اور پی ایس ایل کو دنیا کی بہترین لیگز میں شمار کیا جاتا ہے اس لیے مستقبل میں کسی بڑے منصوبے کے امکان کو رد نہیں کیا جا سکتا۔
ڈیوڈ وائٹ نے کہا کہ آئی ایل ٹی ٹوئنٹی 20 اپنے چوتھے سیزن میں داخل ہو گیا ہے اور اس نے عالمی کرکٹ کے نقشے پر ایک مضبوط، مستحکم اور باوقار شناخت قائم کی ہے۔
انہوں نے کہا کہ اس سال آئی ایل ٹی ٹوئنٹی ٹوئنٹی کا معیار، مقابلہ اور شائقین کی دلچسپی پچھلے تمام سیزنز سے بہت بہتر ہے، کرکٹ کا معیار بہت بلند ہے، میچز شاندار ہیں اور کھلاڑی غیر معمولی کارکردگی کا مظاہرہ کر رہے ہیں۔
ڈیوڈ وائٹ نے کہا کہ آئی ایل ٹی ٹوئنٹی نے سعودی عرب اور کویت کرکٹ کے ساتھ باقاعدہ شراکت داری قائم کی ہے۔ اس معاہدے کے تحت ان ممالک میں ہائی پرفارمنس کرکٹ اور انفراسٹرکچر کو بہتر بنانے میں تعاون فراہم کیا جائے گا۔
انہوں نے کہا کہ سعودی عرب اور کویت کے کھلاڑی اب آئی ایل ٹی ٹوئنٹی 20 نیلامی میں شامل ہو رہے ہیں اور کچھ تو ٹیموں کا حصہ بھی بن چکے ہیں۔ مستقبل قریب میں ان ممالک میں آئی ایل ٹی ٹوئنٹی 20 میچز کرانے پر بھی غور کیا جا رہا ہے۔
ڈیوڈ وائٹ نے مزید کہا کہ متحدہ عرب امارات کی ٹیم کا ایشیا کپ کے لیے کوالیفائی کرنا اور اب بھارت اور سری لنکا میں ہونے والے ٹی ٹوئنٹی ورلڈ کپ میں جگہ بنانا اس بات کا واضح ثبوت ہے کہ آئی ایل ٹی ٹوئنٹی ٹوئنٹی نے مقامی کھلاڑیوں کو عالمی معیار کی کرکٹ سے روشناس کرایا ہے۔
انہوں نے کہا کہ اس لیگ کے ذریعے یو اے ای کے نوجوان کھلاڑیوں کو دنیا کے بہترین کرکٹرز کے ساتھ کھیلنے، جدید کوچنگ حاصل کرنے اور عالمی تجربہ حاصل کرنے کا موقع مل رہا ہے۔ مستقبل میں، ہم چاہتے ہیں کہ اماراتی کھلاڑی بھی بڑی سطح پر اس لیگ کا حصہ بنیں۔
ڈیوڈ وائٹ نے مستقبل میں خواتین کی لیگ کی تنظیم کا اعلان بھی کیا۔
مزید پڑھیں:کسٹمز کی کارروائی، کروڑوں مالیت کا سامان ضبط
