تل ابیب(اے بی این نیوز)اسرائیلی وزیر اعظم بن یامین نیتن یاہو نے اسرائیلی صدر اسحاق ہرزوگ سے انہیں کرپشن مقدمات میں معافی دینے کی درخواست کردی۔
غیر ملکی خبرساں ایجنسی کے مطابق نیتن یاہو نے صدر کو ایک باضابطہ درخواست دیتے ہوئے اپنے کئی برسوں سے جاری کرپشن کے مقدمے میں معافی کی اپیل کی ہے۔
نیتن یاہو کا مؤقف ہے کہ فوجداری کارروائیاں بطور وزیر اعظم ان کے اُمور میں رکاوٹ بن رہی ہیں اور یہ معافی اسرائیلی معاشرے کے مفاد میں ہوگی۔
اسرائیلی اپوزیشن لیڈر یائیر لاپید نے اس حوالے سے اپنے بیان میں کہا ہے کہ نیتن یاہو کو اپنے جرم کا اقرار کرنے، اس پر نادم ہونے اور سیاست ترک کرنے کی صورت میں ہی معافی ملنی چاہیے۔
خیال رہے کہ نیتن یاہو طویل ترین مدت تک خدمات انجام دینے والے اسرائیلی وزیراعظم ہیں۔ ان کے وکلا نے صدر کے دفتر کو بھیجے گئے خط میں کہا ہے کہ وزیراعظم کا اب بھی یقین ہے کہ قانونی کارروائی کا اختتام مکمل بریت پر ہوگا۔
نیتن یاہو نے اپنی جماعت لیکود کی جانب سے جاری کردہ ایک مختصر ویڈیو بیان میں کہا ہے کہ ’میرے وکلا نے آج صدر کو معافی کی درخواست بھیج دی ہے۔ میں توقع کرتا ہوں کہ جو بھی ملک کی بہتری کا خواہش مند ہے وہ اس اقدام کی حمایت کرے گا‘۔
یاد رہے کہ رواں ماہ امریکی صدر ڈونلڈ ٹرمپ نے اسرائیلی صدر سے درخواست کی تھی وہ کرپشن کے مقدمے میں اسرائیلی وزیر اعظم کو معاف کردیں۔
اسرائیلی صدر اسحاق ہرزوگ کے دفتر کے مطابق ڈونلڈ ٹرمپ نے ایک خط میں اسرائیلی صدر سے مطالبہ کیا تھا کہ وہ اسرائیلی وزیراعظم بن یامین نیتن یاہو کو معافی دینے پر غور کریں۔
مزید پڑھیں۔حکومت کا پیٹرولیم مصنوعات کی قیمتوں میں کمی کا اعلان
