اہم خبریں

ملک بھر میں موسم کیسا رہے گا، نئی پیشگوئی جاری کردی گئی

اسلام آباد، کراچی، لاہور (اے بی این نیوز) محکمہ موسمیات نے ملک بھر کے موسم کے حوالے سے نئی پیشگوئی جاری کردی ہے، جس کے مطابق آئندہ 24 گھنٹوں کے دوران بیشتر علاقوں میں موسم خشک اور سرد رہے گا جبکہ میدانی علاقوں میں دھند اور اسموگ کا راج برقرار رہے گا۔

محکمہ موسمیات کے مطابق آج رات بھی ملک کے زیادہ تر علاقوں میں موسم سرد اور خشک رہے گا، جبکہ پہاڑی علاقوں میں شدید سردی برقرار ہے۔ پنجاب اور خیبر پختونخوا کے میدانی علاقوں میں دھند اور اسموگ کی شدت میں اضافے کا امکان ظاہر کیا گیا ہے۔

ملک میں سب سے کم درجہ حرارت اسکردو میں منفی 11 ڈگری سینٹی گریڈ ریکارڈ کیا گیا۔ اسلام آباد میں 3، لاہور میں 7، کراچی میں 13، پشاور میں 2 اور کوئٹہ میں منفی 4 ڈگری سینٹی گریڈ ریکارڈ ہوا۔

ادھر بلوچستان کے خشک سالی کے شکار علاقوں کے لیے محکمہ موسمیات نے خوشخبری سنائی ہے۔ دسمبر میں گرج چمک کے ساتھ شدید بارشوں کی پیشگوئی کرتے ہوئے بتایا گیا ہے کہ مغربی ہواؤں کا طاقتور سلسلہ 6 سے 10 دسمبر کے دوران بلوچستان میں داخل ہوگا، جس کے بعد بارشوں کا پہلا بھرپور اور طویل مرحلہ شروع ہو جائے گا، جو پورے مہینے وقفے وقفے سے جاری رہنے کا امکان ہے۔

محکمہ موسمیات نے شہریوں کو مشورہ دیا ہے کہ دھند اور اسموگ کے باعث ٹریفک میں مشکلات بڑھ سکتی ہیں، مسافر سفر سے پہلے احتیاطی تدابیر اختیار کریں۔

مزید پڑھیں :گورنر راج؟کے پی حکومت کا دھڑلے دار رد عمل آگیا،جا نئے کیا

متعلقہ خبریں