اسلام آباد(اے بی این نیوز)بنی گالہ میں سابق وزیراعظم عمران خان کی رہائشگاہ کے قریب ایک بار پھر آگ بھڑک اٹھی، جس کے باعث علاقے میں شدید دھواں پھیل گیا۔
رہائشگاہ کے اطراف تعینات اسٹاف نے فوری طور پر اپنی مدد آپ کے تحت آگ پر قابو پانے کی کوششیں شروع کر دیں۔عینی شاہدین کے مطابق آگ رہائشی علاقے کے بالکل نزدیک لگی جس سے سکیورٹی اہلکاروں اور موجود اسٹاف میں تشویش کی لہر دوڑ گئی۔ فوری طور پر فائر بریگیڈ کو اطلاع دی گئی، تاہم ابتدائی کوششوں میں عمران خان کے گھر کا عملہ ہی آگ بجھانے میں مصروف رہا۔
آگ لگنے کی وجہ تاحال معلوم نہیں ہو سکی، تاہم متعلقہ اداروں نے معاملے کی تحقیقات کا آغاز کر دیا ہے۔ اسٹاف کا کہنا ہے کہ اگر فوری کارروائی نہ کی جاتی تو آگ مزید پھیل سکتی تھی، جس سے قیمتی املاک کو نقصان پہنچنے کا خدشہ تھا۔
واضح رہے کہ اس سے قبل بھی بنی گالہ کے اسی علاقے میں آگ لگنے کے چند واقعات رپورٹ ہو چکے ہیں، جس کے بعد حفاظتی اقدامات مزید سخت کرنے کی ہدایات جاری کی گئی تھیں۔تازہ واقعہ ایک بار پھر سکیورٹی اور فائر سیفٹی کے انتظامات پر سوالات کھڑا کر رہا ہے۔
مزید پڑھیں: مردان،اہم سیاسی شخصیت کی سگریٹ فیکٹری پر چھاپہ
