اسلام آباد(نیوزڈیسک)پاکستان ٹیلی کام اتھارٹی (پی ٹی اے) نے غیر قانونی مواد کی وجہ سے ملک میں وکی پیڈیا کی سروسز محدود کردیں۔پاکستان ٹیلی کیمونیکیشن اتھارٹی نے بدھ کو اپنے بیان میں بتایا کہ ’توہین آمیز مواد کو بلاک نہ کرنے / نہ ہٹانے کی وجہ سے وکی پیڈیا کی سروسز محدود کی گئی ہیں۔پی ٹی اے کے مطابق قابل اطلاق قانون اور عدالتی حکم (احکامات) کے تحت نوٹس جاری کرکے مذکورہ مواد کو بلاک کرنے / ہٹانے کیلئے وکی پیڈیا سے رابطہ کیا گیا تھا۔بیان میں یہ وضاحت بھی کی گئی ہے کہ معاملے پر سماعت کا موقع فراہم کیا گیا تاہم وکی پیڈیا نے نے نہ تو توہین آمیز مواد ہٹانے کے حکم کی تعمیل کی اور نہ ہی اتھارٹی کے سامنے ان کا نمائندہ پیش ہوا۔ٹیلی کام اتھارٹی کے مطابق ہدایات پر جان بوجھ کر عمل نہ کرنے کے پیش نظر وکی پیڈیا کی سروسز کو 48 گھنٹوں کیلئے محدود کردیا گیا ہے۔ یہ تنبیہ بھی کی گئی ہے کہ محدود پابندی کے ساتھ پلیٹ فارم کو رپورٹ کردہ مواد کو بلاک / ہٹانے کی ہدایت دی گئی ہے، تعمیل نہ کرنے کی صورت میں پلیٹ فارم پاکستان کے اندر بلاک کردیا جائے گا۔پاکستان ٹیلی کام اتھارٹی کے مطابق رپورٹ کردہ غیرقانونی مواد کو بلاک کرنے، ہٹانے کے بعد ویب سائٹ پر سے پابندی اٹھائے جانے پر دوبارہ غور کیا جائے گا۔
