اسلام آباد(نیوز ڈیسک ) ڈائریکٹر جنرل (ڈی جی) پاسپورٹ نے عازمین حج کے لیے خصوصی ڈیسک قائم کرنے کا اعلان کیا ہے جس کے تحت وہ صرف 24 گھنٹے میں پاسپورٹ حاصل کر سکیں گے۔
ڈی جی پاسپورٹ مصطفیٰ جمال قاضی کے مطابق ہیڈ کوارٹر سمیت تمام علاقائی دفاتر میں خصوصی ڈیسک قائم کیے جائیں گے اور یہ سہولت دنیا بھر میں قائم پاسپورٹ دفاتر میں بھی دستیاب ہوگی۔
ڈی جی پاسپورٹ نے کہا کہ عازمین حج کے ساتھ خصوصی کاؤنٹرز پر ترجیحی بنیادوں پر نمٹا جائے گا اور 24 گھنٹے میں پاسپورٹ کی فراہمی کو یقینی بنایا جائے گا۔واضح رہے کہ اس سال سرکاری اسکیم کے تحت 0.2 ملین روپے درخواست کے ساتھ جمع کرائے جائیں گے۔ قرعہ اندازی میں 0.4 ملین روپے اور باقی رقم 10 فروری تک جمع کرائی جائے گی۔
سرکاری سکیم کے لیے حج درخواستیں 3 دسمبر تک جمع کرائی جا سکتی ہیں، اگر درخواستیں کوٹے سے زیادہ ہوں تو ریگولر سکیم کے لیے قرعہ اندازی 6 دسمبر کو ہو گی۔سرکاری کوٹہ اسپانسر شپ اسکیم پہلے آئیے پہلے پائیے کی بنیاد پر ہے۔ اسپانسر شپ اسکیم کے لیے تمام فنڈز کو یکمشت ڈالرز میں جمع کرنے کی ضرورت ہوتی ہے۔ گزشتہ سال حج درخواستوں کی کم تعداد کے باعث درخواستیں جمع کرانے کے لیے 10 دن کی توسیع بھی دی گئی تھی۔
مزید پڑھیں: پی ٹی آئی احتجاج سے قبل راولپنڈی میں دفعہ 144 نافذ
