اسلام آباد (نیوز ڈیسک) ملک کے اکانوے منتخب اضلاع میں مختلف دورانیے کی انسداد پولیو مہم (آج) پیر سے شروع ہوگی۔مہم کے دوران پانچ سال سے کم عمر کے چوبیس ملین سے زائد بچوں کو انسداد پولیو کے قطرے پلائے جائیں گے۔
مزید پڑھیں کسان بورڈ پنجاب کے سربراہ کو گرفتار کر لیا گیا
یہ مہم پنجاب کے دس اضلاع، سندھ کے 24 اضلاع، خیبرپختونخوا کے 26 اضلاع، بلوچستان کے 30 اضلاع اور وفاقی دارالحکومت اسلام آباد میں چلائی جا رہی ہے۔
دوسری جانب وزیراعظم محمد شہباز شریف کا کہنا ہے کہ پاکستان ملک سے پولیو کے خاتمے کے لیے انتھک محنت کر رہا ہے اور پولیو سے پاک پاکستان کے ہدف تک پہنچنے کے لیے تمام بین الاقوامی شراکت داروں کی جانب سے مسلسل کوششوں کی ضرورت ہے۔وہ پیر کو ریاض میں ورلڈ اکنامک فورم کے خصوصی اجلاس کے موقع پر بل اینڈ میلنڈا گیٹس فاؤنڈیشن کے بانی اور شریک چیئرمین بل گیٹس سے گفتگو کر رہے تھے۔
پاکستان میں پولیو کے خاتمے کے لیے فاؤنڈیشن کی دیرینہ حمایت پر شکریہ ادا کرتے ہوئے وزیراعظم نے کہا کہ ملک اس سلسلے میں فاؤنڈیشن کے ساتھ اپنی مضبوط شراکت داری جاری رکھے گا۔
انہوں نے کہا کہ گیٹس فاؤنڈیشن پاکستان کی سماجی و اقتصادی ترقی میں ایک قابل اعتماد شراکت دار ہے اور ہم آئی ٹی، سائنس کی تعلیم اور ڈیزاسٹر مینجمنٹ سمیت دیگر شعبوں میں مزید تعاون کے خواہاں ہیں۔
اس موقع پر بل گیٹس نے بطور وزیر اعلیٰ شہباز شریف کی قیادت میں پنجاب میں حفاظتی ٹیکوں اور پولیو کے قطرے پلانے کے پروگرام کو یاد کیا اور حفاظتی ٹیکوں کے پروگرام کو کامیاب بنانے کے لیے اسی طرز عمل کو ملک بھر میں دہرانے پر زور دیا۔انہوں نے پاکستان کی کوششوں کو سراہتے ہوئے کہا کہ پولیو کا خاتمہ مستقبل کی نسلوں کو اس موذی مرض سے بچانے کے لیے بہت ضروری ہے۔
وزیراعظم اور بل گیٹس نے پاکستان اور فاؤنڈیشن کے درمیان حفاظتی ٹیکوں، غذائیت اور مالیاتی شمولیت کے شعبوں میں جاری سرگرمیوں پر بھی تبادلہ خیال کیا۔وزیراعظم نے بل گیٹس کو دورہ پاکستان کی دعوت بھی دی۔
