لاہور(نیوزڈیسک)پاکستان کرکٹ بورڈ (پی سی بی) نے فاسٹ باؤلر حارث رؤف کا سینٹرل کنٹریکٹ بحال کردیا۔
پی سی بی کی ایک کمیٹی کی طرف سے مکمل سماعت کے عمل کے بعد اور معاملے میں شامل تمام اسٹیک ہولڈرز کے خیالات کو مدنظر رکھتے ہوئے حارث کا سینٹرل کنٹریکٹ یکم دسمبر 2023 سے ختم کر دیا گیا اور انہیں 30 جون 2024 تک کسی بھی غیر ملکی لیگ میں کھیلنے کی این او سی جاری کرنے سے انکار کردیا گیا تھا۔
ان کی اپیل کے بعد پی سی بی کے چیئرمین محسن نقوی نے اتوار کو لاہور میں ایک پریس کانفرنس میں رؤف کا معاہدہ بحال کرنے کا اعلان کیا۔
مزیدپڑھیں:خواجہ آصف کا سیالکوٹ کیلئے 7بڑے منصوبوں کا اعلان
انہوں نے کہا کہ ہمیں حارث رؤف کا ایک خط ملا ہے جس میں انہوں نے لکھا ہے کہ غلط فہمی ہوئی تھی جس پر انہوں نے غلط فیصلہ کیا تھا ہمیں ان کا خط تحریری طور پر موصول ہونے کے بعد ہم نے ان کا سینٹرل کنٹریکٹ بحال کر دیا ہے۔
چیئرمین پی سی بی محسن نقوی نے پریس کانفرنس کے دوران بتایا کہ حارث رؤف نے اپیل کی تھی جو ٹربیونل کو بھیجی گئی۔
انہوں نے کہا کہ حارث رؤف اسٹار پلیئر ہیں، ان کا خیال رکھنا ضروری تھا۔
خیال رہے کہ پی سی بی نے دورہ آسٹریلیا کے لیے پاکستان کے ٹیسٹ اسکواڈ میں شامل ہونے سے انکار پر حارث رؤف کا سینٹرل کنٹریکٹ 15 فروری 2024 کو ختم کردیا تھا۔
