ممبئی (اے بی این نیوز) بالی ووڈ کے معروف اداکار اجے دیوگن نے اپنی اہلیہ اور نامور اداکارہ کاجول کی سالگرہ کے موقع پر ایک دلکش اور مزاحیہ ویڈیو شیئر کرکے مداحوں کی توجہ اپنی جانب مبذول کرا لی۔
کاجول نے 5 اگست کو اپنی 52ویں سالگرہ منائی، جس پر اجے دیوگن نے سوشل میڈیا پر ایک خصوصی ویڈیو پوسٹ کی۔ ویڈیو میں مختلف مواقع پر کاجول کو اجے دیوگن کے لطیفوں پر قہقہے لگاتے ہوئے دیکھا جا سکتا ہے، جس نے دونوں کی خوبصورت رفاقت کی جھلک پیش کی۔
ویڈیو کے ساتھ اجے دیوگن نے دلچسپ انداز میں لکھا:
“میرے بہترین لطیفوں کی سب سے وفادار سامع تمام برسوں سے صرف ایک ہی رہی ہے۔ سالگرہ مبارک ہو، کاجول
اجے دیوگن کی یہ پوسٹ سوشل میڈیا پر تیزی سے وائرل ہوگئی، جہاں مداحوں نے جوڑے کی محبت اور باہمی کیمسٹری کو خوب سراہا۔ ایک صارف نے تبصرہ کیا، یہ سالگرہ کی سب سے خوبصورت پوسٹ ہے، جبکہ دوسرے نے لکھا، اجے دیوگن نے ایک بار پھر ثابت کر دیا کہ چھوٹے مگر دل سے کیے گئے اشارے سب سے زیادہ خاص ہوتے ہیں۔
مداحوں اور شوبز شخصیات کی جانب سے کاجول کو سالگرہ کی مبارکباد دینے کا سلسلہ بھی سوشل میڈیا پر جاری ہے۔
مزید پڑھیں: نادرا دفاتر میں کیاسک مشین استعمال کرنے کا مکمل طریقہ
