اسلام آباد( اے بی این نیوز ) چیئرمین سینیٹ، محمد صادق سنجرانی نے تمام دنیا کے پارلیمانوں اور بین الپارلیمانی یونین کے صدر کوخطوط ارسال کیے ہیں۔ خطوط میں بین المذاہب ہم آہنگی کے فروغ اور مذہبی جذبات کو مجروح ہونے سے روکنے کے لیے اجتماعی کوششوں پر زور دیا گیا ہے۔ خطوط میں سویڈن میں قرآن پاک کی بے حرمتی کے حالیہ واقعہ پر تشویش کا اظہار کیا گیا ہے۔محمد صادق سنجرانی نے بین الاپارلیمانی یونین IPU کے صدر کو بھی خط ارسال کیا ہے۔ چیئرمین سینیٹ نے ارسال کیے گئے خطوط میں سویڈن میں قرآن پاک کی بے حرمتی کے واقعہ کو انگولا میں منعقد ہونے والے 147ویں بین الپارلیمانی یونین جنرل اسمبلی اجلاس میں ہنگامی ایجنڈا آئٹم کے طور پر شامل کرنے کی تجویز پیش کی۔ ارسال کیے گئے خطوط میں چیئرمین سینیٹ نے کہا کہ عالمی امن، رواداری اور بین المذاہب ہم آہنگی کو یقینی بنانے کے لیے وسیع تر عالمی تعاون کی ضرورت پر زور دیا۔ انکا کہنا تھا کہ اسلام رواداری، امن، خوشحالی اور انسانیت سے محبت جیسی اقدار کو فروغ دیتا ہے۔ اس طرح کے واقعات دنیا بھر کے مسلمانوں کے لیے ناقابل برداشت تکلیف کا باعث ہیں اور اس کی جتنی مذمت کی جائے کم ہے۔ پارلیمنٹیرینز اور عالمی رہنماؤں کو اسلام کے بارے میں غلط فہمیوں کو دور کرنے کے لئے اپنا کردار ادا کرنا ہوگا۔ عالمی سطح پر لوگوں کو اسلام کی حقیقی تعلیمات سے آگاہ کرنیکی ضرورت ہے۔ بات چیت، افہام و تفہیم اور باہمی احترام عالمی امن کیلئے ناگزیر ہیں۔ قوموں کے درمیان ہم آہنگی کو فروغ دینے کی ضرورت ہے۔
