اسلام آباد(اے بی این نیوز )وزیر خزانہ و محصولات سینیٹر محمد اسحاق ڈار نے ملک میں سود سے پاک اسلامی بینکاری اور مالیات کو فروغ دینے اور اس کی حوصلہ افزائی کے لیے شریعت کے مطابق مالیاتی نظام کے نفاذ کے حکومت کے پختہ عزم کا اعادہ کیا۔ان خیالات کا اظہار انہوں نے پیر کو سنٹرل ڈائریکٹوریٹ آف نیشنل سیونگ (سی ڈی این ایس) کی جانب سے شریعت کمپلائنٹ پروڈکٹس کی لانچنگ تقریب سے خطاب کرتے ہوئے، وزیر نے کہا کہ ڈائریکٹوریٹ نے شریعت کے مطابق سرمایہ کاری اور بچت اسکیم کو ڈیزائن اور متعارف کرایا ہے جس کا باقاعدہ آغاز یکم جولائی 2023 سے کیا جائے گا۔ وزیر خزانہ نے کہا کہ سی ڈی این ایس نے ایک سال کی تین سال اور پانچ سالہ شرائط پر مبنی چار سرمایہ کاری اور بچت کی مصنوعات شروع کی ہیں، اس کے علاوہ بچت اکاؤنٹ کی سہولت شروع کی ہے، انہوں نے مزید کہا کہ یہ ماہانہ منافع کے ساتھ ایک اچھا اسکیم ہے ۔ اسحاق ڈار نے مزید بتایا کہ وزیر خزانہ کا عہدہ سنبھالنے کے فوراً بعد انہوں نے سٹیٹ بینک آف پاکستان اور نیشنل بینک آف پاکستان کو وفاقی شرعی عدالت کے فیصلے کے خلاف اپنی درخواستیں واپس لینے کی ہدایت کی تھی جس میں عدالت نے ملک میں بلاسود بینکاری اور مالیاتی نظام کو نافذ کرنے کا حکم دیا تھا۔
