پشاور(نیوزڈیسک) قبائلی اضلاع کےعمائدین نے کہا کہ مردم شماری سے پہلے الیکشن کرانا قبائلیوں کو اس سے باہر کرنے کی سازش ہے، ہماری آبادی ایک کروڑ 20 لاکھ ہے جسے 50 لاکھ ظاہرکیا گیا،ہمارے ساتھ ناانصافی کا ازالہ کیا جائے نہیں تو اسلام آباد کی سڑکوں پر احتجاج کرینگے۔آج پشاورمیں قبائلی اضلاع کےعمائدین نے پریس کانفرنس کرتے ہوئے کہا کہ انضمام سے پہلے سینٹ میں نمائندگی ختم کی گئی اب صوبائی نشستیں کم کی جارہی ہیں۔عمائدین مین حاجی اختر گل میئر جنوبی وزیرستان، مولانا رفیع الدین، محمد شعیب ایم پی اے جے یو آئی و دیگر شامل تھے ۔قبائلی عمائدین ن مزید کہا کہ سپریم کورٹ سے اپیل ہے ہمارا حق دیا جائے، جبکہ آپریشن کے دوران گرائے گئے مکانات کا معاوضہ دیا جائے، پچھلے 20 سال سے قبائلی خطہ محروم طبقہ ہے ہماری آدھی سے زیادہ آبادی مردم شماری سے رہ گئی تھی ہماری ایک کروڑ 20 لاکھ ہے جسے 50 لاکھ ظاہرکیا گیا۔انہوں نے کہا کہ انضمام کے نام پرمذاق کیا گیا اور قبائلی عوام کے ساتھ بددیانتی کی گئی، جبکہ سپریم کورٹ میں انضمام کے خلاف کیس نہیں سنا جارہا ہے، دوبارہ مردم شماری کی جارہی ہے ہمارے ساتھ زیادتی کا ازالہ کیا جائے نہیں تو اسلام آباد کی سڑکوں پر احتجاج کرینگے۔