لوئر کرم (اے بی این نیوز)لوئر کرم کے علاقے بگن میں پارا چنار سے پشاور جانے والے قافلے پر جمعہ کو نامعلوم افراد کے حملے میں کم از کم 3 افراد ہلاک اور متعدد لاپتا ہوگئے، جس کے بعد قبائلی ضلع بھر میں مظاہرے شروع کر دیے گئے۔
قومی اخبار کی رپورٹ کے مطابق کرم ضلعی انتظامیہ کے حکام نے بتایا کہ مسافر بگن کے علاقے داد قمر سے گزر رہے تھے کہ مسلح افراد نے فائرنگ کردی، جس کے نتیجے میں 3 افراد جاں بحق ہوگئے، جن کی شناخت طاہر حسین، صفر علی اور مزار حسین کے نام سے ہوئی، جمعے کی رات دیر گئے تک کئی دیگر لاپتا تھے۔
جاں بحق افراد کی لاشوں کو پاراچنار منتقل کردیا گیا، جہاں حملے کی خبر پر بڑے پیمانے پر احتجاج کیا گیا، ایڈیشنل کمشنر عامر نواز نے تصدیق کی کہ لاشیں لواحقین کے حوالے کردی گئی ہیں، اور واقعے کی تحقیقات جاری ہیں۔مقتولین کے رشتہ داروں کا کہنا ہے کہ یہ افراد ویزوں کی تجدید یا بیرون ملک سفر کے انتظامات کرنے کے لیے پشاور جا رہے تھے، کیوں کہ ان کی دستاویزات کی میعاد ختم ہونے والی تھی۔
ضلع کو خیبر پختونخوا کے باقی حصوں سے ملانے والی تھل پاراچنار روڈ 21 نومبر 2024 کو بگن کے علاقے میں قافلے پر ہونے والے حملے کے بعد سے بند ہے، جس میں 50 سے زائد افراد ہلاک ہوئے تھے، اس کے بعد دہائیوں پرانے زمین ی تنازعات کے نتیجے میں جھڑپوں میں کم از کم 130 افراد ہلاک ہوئے تھے۔سڑک اب بھی ناقابل رسائی ہونے کی وجہ سے ضروری سامان جیسے خوراک اور ادویات کو قافلوں کے ذریعے سرکاری تحفظ کے تحت پہنچایا جاتا ہے، تاہم، قافلوں پر بار بار حملے ہوتے رہے ہیں۔
مزید پڑھیں: ستاروں کی روشنی میں آج بروزہفتہ19پریل 2025 آپ کا کیرئر،صحت، دن کیسا رہے گا ؟
