اسٹاک ہوم(اے بی این نیوز) شامی نوجوان نے اسرائیلی سفارتخانے کے باہر تورات اور بائبل کو جلانے کا منصوبہ اچانک ترک کر دیا ۔ 32 سالہ احمد علوش نے اسٹاک ہوم میں تورات اور بائبل کو جلانے کا منصوبہ ترک کرتے ہوئے بیگ سے لائٹر نکال کر زمین پر پھینک دیا اور کہا کہ اس کا کبھی مقدس کتابوں کو جلانے کا ارادہ نہیں تھا۔ شامی نوجوان کا رد عمل محض قرآن کی بےحرمتی کرنیوالوں کو ایک پیغام دینا تھا کہ مقدس کتابوں کو نہیں جلایا جائے۔احمدعلوش نے اپنے بیگ سے ایک قرآن نکالا اور سویڈن میں قرآن نذر آتش کئے جانے کے پچھلے واقعات پر تنقید کی۔ اس کا کہنا تھا کہ اگر آپ اسلام پر تنقید کرنا چاہتے ہیں تو کریں لیکن قرآن کو جلانا اظہار رائے کی آزادی نہیں بلکہ اشتعال انگیز عمل ہے۔سویڈن کی عدالتوں نے آئینی طور پر اجتماع، اظہار رائے اور مظاہرے کی آزادی کے حق کے پیش نظر مقدس کتابوں کے نسخے جلانے کی اجازت دے رکھی ہے۔